Қасиетті Жер-ана еңкейіп еңбек еткен әрбір еңбекқор жанға барынша қамқор болатыны ақиқат. Жаратқан жыбырлаған пендесін несібесіз қалдырған емес. Ең бастысы – адамның жақсылыққа ұмтылуы, адал жолмен ас табуы. Елу жылдан астам уақыт қасиетті қара жерден нәсібін тапқан Бақалы ауылының тумасы Тоқтарбек Төлепбековтың есімін ерекше атап өткеніміз жөн.
Бүгінде 73 жасқа келген ақсақал Сарқан өңірінің егіс алқабында қант қызылшасын өсірумен айналысады. Ауылдағы ағайынға еңбекқорлықтың, адамгершілік пен кішіпейілділіктің, белсенділік пен алғырлықтың озық үлгісін көрсеткен Тоқтарбек ата ешқашан жұмыстан жалтарған емес.
– Осы жасқа келгенше мен туған жерімде еңбек еттім. 1965 жылы ұжымшар тракторын жүргіздім. Міне, сол жылдан бері ауылшаруашылық техникаларынан алыстамадым. Қант қызылшасын өсіруді 1973 жылы бастадым. Күні бүгінге дейін тәтті түбірден қол үзбедік. Себебі, бұл кәсіпте менің тәжірибем жеткілікті. Осы арқылы адал жолмен нан таптым. Балаларымды жеткіздім. Қазір балаларым да, немерелерім де адалдық жолында еңбек етуде, – дейді ақсақал.
Адал еңбекпен адал табыс тапқан біздің кейіпкеріміз зайыбы Күлсім Божалақова екеуі ұлықты ұл, қылықты қыз тәрбиелеп қана қоймай, ауылшаруашылығымен айналысатын шаруа қожалығын да бірге құрған. Бүгінде бұл қожалықта ұлдары Дәурен мен Жасұлан таңның атысынан, кештің батысына дейін тер төгіп, еңбек етуде. Олар соя, жоңышқа, қант қызылшасын егеді. Қос ұлы асқар таудай әкелері салған сара жолмен жүріп, қарияның ақыл-кеңесіне жүгініп, жемісті еңбек етуде. Ақсу қант зауытының қызылша қабылдау пункті ашылған күні Жасұлан әкесімен бірге жүз тоннаға жуық қызылша алып келді. Тәжірибелі Тоқтарбек атаның ақыл-кеңесінің нәтижесінде «Божалақова» шаруа қожалығы орташа есеппен гектарына 750 центнерден өнім алмақшы. Кей шаруалар қызылшадан орташа өнімділікті гектарына 400 центнерден алуда.
– Жақсы өнім алу үшін тынымсыз еңбек ету керек. Саналы ғұмырымды ауылшаруашылық саласына арнағандықтан өнімге қай уақытта су, қай уақытта минералды тыңайтқыштар беру керектігін жақсы білемін. Десе де табиғи фактор әсер етпей қоймайды. Алайда биылғы өнім өте жақсы болды. Осы жасыма дейін ала жаздай жер тырмалап байып кеткем жоқ. Бірақ балаларды қатарынан кем қылмай өсірдік. Оқыттық. Үйлі еттік. Қазір бәрі бір-бір шаңырақтың иесі. Немерелерім де жастайынан еңбекке араласады. Көзге көрінген шөберемді де еңбекке баулимын деп отырмын. Қарапайым адамға бақытты болу үшін осыдан артық не қажет? Мен нағыз бақытты адаммын, – дейді Тоқтарбек ата.
Адал азамат адал еңбек еткенінің нәтижесінде Сарқан ауданының Құрметті азаматы атағын иеленген еңбек ардагері. Міне, дәл осындай қарапайым ғана еңбек адамы өскелең ұрпаққа үлгі-өнеге болуы тиіс. Олай болса, еңбекпен көктеп-көгерген Тоқтарбек атаға ғасыр асқан ата басылым атынан ұзақ ғұмыр тілейміз.
