«Егіні біткеннің қырманына қыдыр қонады» – дейді дана халқымыз. Берекені маңдай термен терген жанның тірлігі қашанда құтты. Соның айғағы – бүгін қамбасы қызылшаға толған Бірлік Тұрсынұлының еңбегі.
Талдықорған қаласының «Тәжірибе XXI» ЖШС-да табан аудармай тоғыз жыл қызмет етіп келе жатқан ол жердің тілін білген диқан. Алғашында төрт жыл трактор тізгіндеген тәжірибелі маман бүгінде бригадирлік жауапкершілікті арқалап отыр. Қарамағында бес адам еңбек етеді: екеуі тракторшы, қалғаны сушы және күзетші. Сондай-ақ, шаруашылықта бес трактор мен бір комбайн тынымсыз іске қосылған.
Алпысты алқымдаған еңбек адамының айтуынша, диқаншылық төзім мен табандылықты талап ететін сала. Оның қарауындағы 78 гектар алқапта қызылшамен қатар жоңышқа, жүгері тәрізді дақылдар өсіріледі. Өткен жылы 10 гектар қызылшадан 300 тоннадан астам өнім жинаса, биылғы жоспары 500 тонна. Тыңайтқыш ретінде селитра мен қорда қолданылып, әрбір түпке ұқыпты күтім жасалады.
Бірлік ағамыз екі қыз, бір ұл тәрбиелеп отырған ардақты әке. Тіршіліктің ауыр жүгін арқалаған азаматтың отбасы да еңбекпен өрілген. Жары қалалық балалар ауруханасында қызмет етеді.
Жер ананың қасиетін ұққан жанның ырысы да мол, еңсесі де биік. Сол биік еңсесі ешқашан төмен түспесін деп тіледік.
Санжар СҰЛТАНҒАЗЫ
