Мемлекет басшысы Қасым-Жомарт Тоқаевтың «Заң мен Тәртіп» қағидаты аясында Ескелді ауданында ауқымды профилактикалық және үйлестіру жұмыстары жүргізіліп жатыр. Аудандағы құқық бұзу 17,2 пайызға төмендеді. Биылғы жылдың алты айының қорытындысы бойынша көрсеткіш 99-дан 82-ге азайды, оның ішінде қылмыстар 77-ден 68-ге, ал теріс қылықтар 22-ден 14-ке қысқарды. Адам өлтіру, денсаулыққа қасақана ауыр зиян келтіру және тонау сияқты аса ауыр қылмыстар мүлдем тіркелген жоқ. Сонымен қатар жалпы алаяқтық, масаң күйде және отбасылық-тұрмыстық салада жасалатын заң бұзу азайды.
Құқық қорғау органдарының басты ұстанымы – салдарымен күресу емес, қылмыстың алдын алу. Осы мақсатта ауданның 11 ауылдық округінде халықпен, пробация есебіндегі және тәуекел тобындағы азаматтармен жүйелі кездесулер өтті. Сотталғандарды қоғамға бейімдеу үшін «Пробация үйі» жобасы жүзеге асып, Мансап орталығымен бірлесіп жұмыспен қамту және әлеуметтік қолдау шаралары қолға алынды. Бұл жөнінде Ескелді ауданы прокуратурасының прокуроры, 1-ші санаттағы юрист Иманасип Қорабаев айтты.
Оң нәтижемен қатар, мал ұрлығы, интернет-алаяқтық және көлік қылмыстарының өсімі байқалып отыр. Аталған бағыттар прокуратураның ерекше бақылауында. Мал ұрлығы бойынша барлық іс сотқа жолданып, жәбірленушілердің шығыны толық қайтарылды. Ал интернет-алаяқтыққа қарсы тұрғындарға жеке деректері мен СМС-кодтарын бөгде адамдарға бермеу қажеттігі түсіндірілуде.
Заңдылықты сақтау және азаматтар мен мемлекет мүддесін қорғау бағытында да ауқымды жұмыстар атқарылды. Қадағалау актілерінің нәтижесінде 1 138 кәсіпкердің құқығы қорғалып, пайдаланылмай жатқан 1 310 гектар жер мемлекет меншігіне қайтарылды. Сондай-ақ еңбек құқықтары қорғалып, 392 педагог арнайы қорғаныш құралдарымен қамтамасыз етілді, ал балалар арасындағы суицидтің алдын алу шараларының арқасында бұл бағытта ешқандай заңбұзушылық тіркелген жоқ.
Ескелді ауданының прокуратурасы қоғамда қауіпсіз әрі әділетті орта қалыптастыру жұмыстарын әрі қарай да жүйелі түрде жалғастырады және кез келген заңсыздық фактісі бойынша азаматтарды прокуратура органдарына еркін жүгінуге шақырады.
«Жетісу-Ақпарат»
