Еліміздің еңбек нарығында белсенділік едәуір артып, бос жұмыс орындары мен сұранысқа ие мамандардың тізімі жаңарды, – деп хабарлайды 7-su.kz ақпараттық порталы.
Қыркүйек айының басындағы жағдай бойынша Enbek.kz Электрондық еңбек биржасында 105 907 өзекті бос жұмыс орны тіркелген. Ал тамыз айында ұсынылған вакансиялар саны шілдемен салыстырғанда 25,8%-ға өсіп, 131,6 мыңға жетті. Сонымен қатар, жұмыс іздеушілер тарапынан 145,2 мың түйіндеме орналастырылған. Бұл көрсеткіштер ұсыныс пен сұраныс арасындағы алшақтықтың едәуір азайғанын айғақтайды.
Тамыз айында жұмыс берушілер тарапынан ең жоғары сұраныс білім беру саласында тіркелді – 61 мың бос жұмыс орны. Мұндай басымдық жаңа оқу жылының басталуымен және білім беру ұйымдарының кадрлық құрамын жасақтау қажеттілігімен тікелей байланысты.
Одан бөлек, кадрлар тапшылығы мына салаларда байқалады:
-
Денсаулық сақтау және әлеуметтік қызметтер;
-
Өңдеу өнеркәсібі мен құрылыс секторы;
-
Ауыл, орман және балық шаруашылығы;
-
Қызмет көрсету бағыты.
Өңірлік деңгейде кадрларға деген ең үлкен сұраныс Астана мен Алматы қалаларына тиесілі – әр мегаполисте 10 мыңға жуық бос жұмыс орны ашық тұр. Жұмыс берушілердің 46,6%-ы жоғары білікті мамандарды іздесе, 33,1%-ы орта білікті кәсіп иелеріне басымдық береді.
Enbek.kz платформасында айына 1 млн теңгеден бастап 2 млн теңгеге дейін табыс ұсынатын вакансиялар жарияланды. Ең жоғары жалақы көрсеткіштері өндіріс пен технология саласының мамандарына тиесілі:
-
Тау-кен өндірісіндегі ауысым бастығы – 2,06 млн теңге;
-
Киберқауіпсіздік маманы – 2 млн теңгеге дейін;
-
Кеніш директоры – 1,63 млн теңге.
Бұл ретте жұмыс іздеушілердің де жалақыдан күтер үміті жоғары. Мәселен, әкімшілік бөлім басшылары 2,02 млн теңге, жаңа өнімдерді әзірлеу жобаларының жетекшілері 1,84 млн теңге, ал сату жөніндегі шеберлер 1,75 млн теңге көлемінде еңбекақы алуды көздейді.
Электрондық еңбек биржасында түйіндеме қалдырған азаматтардың басым бөлігі – 35 жасқа дейінгі жастар. Еңбек нарығында әйелдердің белсенділігі басым: түйіндеме орналастырғандардың 60,6%-ын әйелдер, ал 39,4%-ын ерлер құрайды.
Бұл деректер елімізде жоғары білікті әрі сандық дағдылары дамыған мамандарға деген сұраныстың қарқынды өсіп келе жатқанын дәлелдейді.
