Соңғы үш жылда телекоммуникация саласына 1 трлн теңгеден астам инвестиция бағытталды. Бұл елдегі интернеттің орташа жылдамдығын 94 Мбит/с деңгейіне дейін арттыруға мүмкіндік берді, деп хабарлайды 7-su.kz ақпарттық порталы.
Премьер-министрдің орынбасары – Жасанды интеллект және цифрлық даму министрі Жаслан Мәдиевтің айтуынша, саланың қарқынды дамуы 2024–2027 жылдарға арналған «Қолжетімді интернет» ұлттық жобасы аясында жүзеге асырылып жатыр.
«2027 жылдың соңына дейін халықтың 100%-ы интернетке қол жеткізеді. Интернет жылдамдығы 100 Мбит/с-тан асады. Ал оптикалық байланыс желілері ауылдық елді мекендердің 90%-ына дейін тартылады», – деді вице-премьер Үкімет отырысында.
Ауылдық аймақтарға талшықты-оптикалық желі тартылады
Жоба аясында 2026 жылдың соңына дейін 3000-нан астам ауылды магистральды талшықты-оптикалық байланыс желісіне қосу жоспарланған. Осылайша ауылдардың 90%-дан астамы сымды технологиялар арқылы жоғары жылдамдықты интернетке қосылады.
Қалған шағын елді мекендердің шамамен 10%-ы спутниктік технологиялар арқылы қамтылатын болады. Бұл қадам шалғайдағы ауыл тұрғындарының да цифрлық қызметтерге тең қол жеткізуін қамтамасыз етпек.
«Жалпы алғанда, 2027 жылдың соңына дейін осы бағыттағы жобаларды іске асыру үшін 323 млрд теңге көлемінде инвестиция қарастырылған», – деп нақтылады министр.
Мобильді интернет те кеңейеді
Цифрландыру министрлігінің дерегінше, елімізде мобильді интернеттің де қамту аймағы айтарлықтай ұлғаяды.
2027 жылға дейін:
-
4G желісі барлық елді мекендердің 92%-ына жетеді;
-
5G желісі облыстық және республикалық маңызы бар 20 қалаға енгізіледі;
-
Қалалардың 60–75% аумағы 5G байланысымен қамтылады;
-
40 000 шақырым автожол бойына 4G мобильді интернеті орнатылады.
Бұл шаралар көлік және логистика саласындағы цифрлық қызметтердің дамуына, сондай-ақ қазақстандықтардың мобильді интернет сапасын арттыруға жол ашады.
Цифрлық қауіпсіздік пен алаяқтықпен күрес
Министрлік интернет сапасын арттырумен қатар, байланыс саласындағы қауіпсіздік шараларын да күшейтіп отыр.
«Байланыс операторлары үшін жаңа талаптар енгізілді. Оның ішінде абоненттерді биометриялық идентификациялау, фрод әрекеттерін заңсыз трафикке теңестіру, операторлардың антифрод жүйелері мен Ұлттық банк арасындағы өзара әрекеттесу тәртібін нақтылау қарастырылған», – деді Жаслан Мәдиев.
Министрдің мәліметінше, қабылданған шаралардың нәтижесінде 2024 жылдың басынан бері 30 млн-нан астам күдікті қоңырауға тосқауыл қойылған. Бұл – азаматтардың қаржылық және жеке деректерін қорғауға бағытталған тиімді қадамдардың бірі.
Цифрлық инфрақұрылымды жаңғырту жалғасуда
Кейінгі жылдары интернет инфрақұрылымын жетілдіру мен цифрлық теңсіздікті азайту – Қазақстанның экономикалық дамуы мен инновациялық әлеуетінің негізгі бағыттарының бірі болып отыр.
«Қолжетімді интернет» ұлттық жобасы аясында атқарылып жатқан жұмыстар ауыл мен қала арасындағы байланыс сапасын теңестіруге, электронды қызметтердің қолжетімділігін арттыруға және жаңа жұмыс орындарын ашуға сеп болады.
