«Адам саудасы – ауыр қылмыс!» атты республикалық ақпараттық науқан бастау алды, – деп хабарлайды 7-su.kz ақпараттық порталы.
Қазіргі таңда халықаралық қылмыстық топтар жұмыс іздеген азаматтарды арбау үшін цифрлық технологияларды, әлеуметтік желілер мен интернет-платформаларды белсенді қолданып отыр. Жоғары ақы төленетін жұмыс орындарын уәде етіп, адамдарды жаңылыстырады, бас бостандығынан айырады әрі заңсыз әрекеттерге қатысуға мәжбүрлейді.
Қанаудың мұндай түрі трансұлттық ұйымдасқан қылмыстың ең жылдам таралатын қауіптерінің қатарында. Бас бостандығынан немесе құқығынан айырылатын құрбандардың арасында әртүрлі жастағы, әртүрлі мамандық пен білім деңгейіндегі азаматтар бар.
Заманауи адам саудасы тек жыныстық қанау немесе мәжбүрлі еңбекпен шектелмейді. Қазіргі уақытта азаматтарды алаяқтық, киберқылмыс, заңсыз көші-қон, есірткі саудасы, ұрлық сияқты өзге де қылмыстарға мәжбүрлеп тарту жағдайлары жиілеп кетті.
Осыған орай, Ішкі істер министрлігі 2026 жылғы 24-30 шілде аралығында ауқымды алдын алу шараларын қолға алды. Шараның басты мақсаты – қоғамның назарын осы қауіпті мәселеге аудару, халықтың құқықтық сауаттылығын арттыру, сондай-ақ зардап шеккендерді мемлекеттік қорғау тетіктерін түсіндіру.
Науқанға мемлекеттік, жергілікті атқарушы органдар, полиция бөлімшелері, халықаралық және үкіметтік емес ұйымдар жұмылдырылған. Апта ішінде бүкіл республика бойынша халықпен кездесулер, құқықтық консультациялар өтіп, тұрғындарға түсіндірме материалдары таратылады.
Есте сақтаңыз! Шетелде немесе өзге қалада жұмысқа орналасу туралы ақпаратты мұқият тексерген жөн. Жеке құжаттарды бейтаныс тұлғаларға бермеңіз, күмәнді ұсыныстардан бас тартыңыз. Қандай да бір күдікті жағдай байқалса, бірден құқық қорғау органдарына хабарласыңыз.
Жыл сайын 30 шілдеде Біріккен Ұлттар Ұйымының бастамасымен Дүниежүзілік адам саудасына қарсы күрес күні атап өтіледі. Биыл бұл күн «Алаяқтық тұзағында» ұранымен өтуде. Негізгі назар адам саудасының құрбандарын онлайн-алаяқтық жасауға мәжбүрлеу қаупіне аударылып отыр. Әрбір азамат қырағылық танытып, жақындарына ескерту арқылы бұл қылмыстың алдын алуға өз үлесін қоса алады. Мемлекет пен қоғамның бірлескен әрекеті ғана әрбір адамның қауіпсіздігі мен бостандығын қорғауға кепіл болады.
