Қара сөзбен де, қасиетті қара өлеңмен де оқырманға олжа ұсынып ғажайып шығармалардың авторы атанған Халықаралық «Алаш» әдеби сыйлығының иегері, Қазақстан Жазушылар және Журналистер одағының мүшесі, ақын-жазушы Нұрила Бектемірова 75 жаста. Осыған орай С. Сейфуллин атындағы облыстық кітапханасында «Жан дүниенің жарық әлемі» атты кездесу кеші өтті.
Құстың қос қанатындай елес берер проза мен поэзияны қатар игерген Нұрила Дәнтайқызының мерейтойына орай өткен рухани шара бейнероликпен бастау алды. Онда мағыналы ғұмыр иесінің шығармашылық әлемі, тебіреніс пен толғанысқа толы өткен кезеңі, өмірі туралы сыр шертілді.
«Өз елі өз ерлерін ескермесе, ел тегі қайдан алсын кемеңгерді» деп Ілияс Жансүгіров жырлағандай, кеш кейіпкеріне ыстық ықылас білдіру үшін жетісулық зиялы қауым өкілдері арнайы сөз алды. Алдымен облыстық мәдениет, архивтер және құжаттама басқармасының бөлім басшысы Гүлмира Қалқабаева сөз сөйлеп, рухани шараның мәні мен мазмұнына тоқталды. Сонымен қатар ол облыс әкімінің орынбасары Диас Есдәулет пен мәдениет басқармасының басшысы Қуаныш Сүлейменовтың құттықтау хатын оқып берді. Мерейтой иесінің иығына шапан жапты.
Жан тербеген кеш барысында көрнекті ақын Нүсіпбай Әбдірахым, айтыс өнерінің ақтаңгері Айтақын Бұлғақов, ҚР Жазушылар одағы Жетісу облыстық филиалының директоры Жангелді Немеребай секілді қаламгерлер мен кеш кейіпкерінің жақындары сөз алып, мерейтой иесіне ізгі ниеттерін білдірді.
Жазушы қаламынан бертінде жазылған шығармалар топтастырылған «Өмірдің өзгермейтін жұмбағы» кітабының тұсаукесер рәсімі өтті. Сонымен қатар қаламгер жерлестері де ізгі тілек білдірген рухани шара барысында ақынның сөзіне жазылған «Қабан жырау бабамыз», «Адам деген бар атым» әндерін асқақтатты.
Арайлым АБЫЛҒАЗЫ
І. Жансүгіров атындағы ЖУ-дің білімгері
