Төтенше жағдайлар министрлігіне қарасты сейсмикалық стансалар желісі Алматы облысында екі мәрте жер сілкінісін тіркеді. Соңғы жер дүмпуі Алматы уақытымен кешкісін 21 сағат 54 минутта болған.
«Зілзала ошағы Алматыдан шығысқа қарай 89 шақырым қашықтықта, Алматы облысының Еңбекшіқазақ ауданы, Қаратұрық ауылынан шамамен 30 шақырым жерде орналасқан. Энергетикалық класы — 7.4. MVP магнитудасы — 3.7. Бағыты — 43.42° с.е. 77.96° ш.б. Тереңдігі — 25 шақырым. Сезілгені жайлы мәлімет жоқ», — делінген хабарламада.
Үй қирағаны немесе адам шығыны жайлы мәлімет түскен жоқ.
Екінші жер дүмпуі 15 қыркүйек күні Алматы уақытымен сағат таңғы 10:25-те тіркелді. Жер сілкінісінің эпицентрі Алматы қаласынан шығысқа қарай 145 км жерде Кеген ауданының аумағында (Жалаңаш ауылынан 40 км қашықтықта) орналасқан.
Жер сілкінісінің энергетикалық класы — 7.2. MPV магнитудасы — 3.4. Эпицентрдің координаттары — 43.24° с.е. 78.63° ш.б. Тереңдігі — 10 км.
Сезілетіндігі туралы мәліметтер (МЅК-64 шкаласы бойынша) жоқ.
Департамент өкілдері жер сілкінісі кезінде не істеу керектігін айтып берді. Олар мынадай:
— ғимараттан шығыңыз (сізде 15-20 секунд қана уақыт бар);
— егер жоғарғы қабатта болсаңыз, кіретін есіктің саңылауына немесе балаларды құшақтап, негізгі қабырғалардың бұрышына барып тұрыңыз;
— ешқандай жағдайда терезе жанына бармаңыз және балконнан секірмеңіз.
— ғимараттардан, құрылыстан, бағаналар мен қоршаулардан алыс тұрыңыз;
— үйге кірмеңіз: дүмпулер қайталануы мүмкін;
— лифт (жеделсаты) пайдаланбаңыз;
— сіріңке, шам жақпаңыз:
— электр сымдарын ұстамаңыз;
— зардап шеккендерге алғашқы көмек көрсетіңіз.
«АЛАТАУ-АҚПАРАТ»
