«ҚазТрансОйл» акционерлік қоғамының бастауымен, Алакөл ауданы әкімдігінің қолдауымен Үшарал қаласынан Мұнайшылар аллеясы ашылды.
Ардагерлер үйінің маңынан ашылған жаңа аллеяның алдына ел ағалары мен мұнай өндіріп, зерттеуге сүбелі үлес қосып жүрген сала қызметкерлері жиналды.
Шараға Алакөл ауданы әкімінің орынбасары Дәурен Қанағатов, «ҚазМұнайГаз» акционерлік коғамы шығыс операторлық қызметтер көрсету басқармасының басшысы Бегайдар Маденов қатысып, барша мұнай-газ саласының ардагерлері мен қызметкерлерін аллеяның ашылуымен құттықтады.
— Бүгінгі таңда аудан орталығы Үшарал қаласында халық қажеттілігі үшін түрлі ғимараттар бой көтеруде. Сонымен бірге, мемлекетіміз халықтың әл-ауқаты мен болашақ ұрпақтың бос уақытын дұрыс пайдалануын басты назарға қойып, жер-жерде жалпы халық демалатын түрлі орындар көптеп ашылуда. Оның айғағы аудан орталығындағы «Жастар» демалыс саябағы мен «Астана», «Талапкер» саябақтары бүгінгі күнде халықтын ең көп жиналатын орнына айналып отыр. Бүгінгі ашылған Мұнайшылар аллеясы да Үшарал қаласының көрікті жерінің біріне айналары сөзсіз, — деді Дәурен Орынбайұлы.
Айта кету керек, аллеяның жалпы ауданы 1338 шаршы метрді құрайды. Оны көркейту мақсатында аумаққа 300 текше метрге жуық құнарлы топырақ әкелініп, жүзден астам қылқан жапырақты ағаш отырғызылған. Сондай-ақ, саяжол қала тұрғындарының демалуына арналған орындықтармен жабдықталған, жолдар тротуар тақтайшаларымен төселген және сәндік жарықтандыру мен ескерткіш гранит постаменті орнатылған. Постаментте көмірсутектердің мәңгілік шексіз қозғалысын білдіретін композиция бейнеленген.
«ЖЕТІСУ-АҚПАРАТ»
