Талдықорған қаласындағы азаматтарды қабылдау орталығында облыстық сауда және тұтынушылардың құқықтарын қорғау департаментінің басшысы Айдос Дауешов тарифтердің көтерілуіне байланысты азаматтарды қабылдады. Кездесу барысында тұтынушылар жаңа тарифтердің бағасы бойынша шағымдарын білдіріп, тиісті сала өкілдерінен тұшымды жауап алды.
Департамент басшысының айтуынша, 2023 жылы облыс тұтынушыларынан 544 өтініш түссе, 2024 жылы бұл сан 1242-ге өскен. Былтыр тұтынушыларға 67001915 теңге қайтарылған. Бұл тұтынушылар құқығы бұзылуының көбейгенін білдіреді.
Қазіргі таңда тарифтердің көтерілуі тұрғындардың қалтасына едәуір салмақ түсіруде. Қабылдауға келген бір тұрғын: «Осы күні, кімге, неге, қандай коммуналдық төлем жасап жатқанымызды білмейтін болдық. «Төлем жасаңыз?» деген сөз жылтыңдап каспий қолданбасына келсе, кешке үйге кірерде есігіңде төленбеген шығынды өтеу туралы ескерту қағазы ілулі тұрады. «Төлемесеңіз сотқа жібереміз» деген ескертпесі тағы бар. Ал біздің құқығымызды кім қорғайды?», – деп мұңын шақты.
«Қазақстанның болашағы үшін жастар қозғалысы» ҚБ-нің тұтынушылардың құқықтарын қорғау жүйесінің жай-күйін, проблемаларын және даму перспективаларын айқындау мақсатындағы зерттеуге республика бойынша 10944, соның ішінде Жетісу облысынан 524 респондент қатысқан. Нәтижесінде, жерлестеріміздің 82 пайызының такси қызметіне көңілі толмаса, 70 пайызы электр энергиясын жеткізуші компанияның қызмет көрсету сапасына қанағаттанабайды. Осы реткі қабылдауға келген азаматтар тарифтердің қымбаттағанына наразы.
Жиында жылу, су, жарық беретін мекемелердің басшылары тарифтердің неліктен көтерілгені туралы түсіндіріп берді. Олардың айтуынша, тариф қымбаттаған, бірақ оның мөлшері қалтаға жүк түсірмейді. Ал азаматтар тарифтердің мейлінше өсіп, елді елеңдетіп тастағанын алға тартты. Ақыры екі тарап та өз ұстанымында қалды. Нақты қорытындысын облыстық тұтынушылардың құқығын қорғау департаменті шығарады.
Қажет Андас
Фото: uralskweek.kz
