Бұл туралы «AMANAT» партиясының Төрағасы Ерлан Қошанов мәслихат депутаттарының республикалық форумында айтты, деп хабарлайды 7-su.kz желілік басылымы.
Ерлан Қошановтың айтуынша, қазір не жағдай болса да халық «Аманат» қайда?» дейтін көрінеді.
«Депутаттардың бел шешіп жұмысқа кірісетін шағы келді. Бұл, әсіресе, мәслихат депутаттарына қатысты. Сіздер – партияның жергілікті жердегі өкілісіздер. Бүкіл өңірлік саясатқа ықпал етесіздер. Сіздердің мойындарыңыздағы жүк жеңіл емес. Бұрын халық әкімді іздейтін, қазір депутаттан сұрайды. Не жағдай болса да, «AMANAT» қайда?» дейді. Оны өздеріңіз де сезініп жатқан шығарсыздар. Біз осы сынаққа дайынбыз» — деді ол өз сөзінде.
Аталған шарада ҚР Премьер-Министрі Әлихан Смайылов та сөз алып, «Аманат» партиясының бағдарламасын жүзеге асырудың Үкімет үшін маңызын атады.
«Мемлекет басшысының Сайлауалды тұғырнамасын және «AMANAT» партиясының бағдарламасын іске асыру – Үкімет жұмысының негізі. Осы бағдарламалық құжаттарды тиімді іске асыру халықтың өмір сүру деңгейін арттыруға мүмкіндік береді. Алдымыздағы мақсаттарға қол жеткізу үшін қажетті ресурстардың барлығы бар. Қойылған міндеттерге қол жеткізу мәслихаттардың да белсенді қатысуын талап етеді» — деді ол.
Фото: ашық дереккөзден
