Қазақстан Республикасы Президентінің Жарлығына сәйкес Жетісу облысының орталығындағы 27 көпбалалы батыр анаға сый-құрмет көрсетілді. Олардың 8-не алтын, 19-на күміс алқа табысталды.
Ұлы Жеңістің 80 жылдық мерейлі мерекесі қарсаңында ұйымдастырылған басқосуда Талдықорған қаласының әкімі Ернат Бәзіл алтын құрсақ аналарды жүрекжарды қуанышымен құттықтап, ізгі тілегін жеткізді.
– Қоғамда отбасы құндылықтарының маңызы зор. Ата-ананың тағылымды тәрбиесін алып өскен бала болашақта ел дамуына өз үлесін қосары анық. Мемлекетіміздің болашақ ұрпағын тәрбиелеп, отырған сіздердей аяулы да асыл аналар аман болсын! Бастарыңызға амандық, шаңырақтарыңызға бақ-береке тілеймін. Мәпелеп отырған ұл-қыздарыңыз үкілеген үміттеріңізді ақтасын», –деді Ернат Дүйсенбекұлы.
Мамандардың мәліметінше, бүгінде Жетісу облыс орталығында тұрғындар саны 207 мыңға жуықтаған. Олардың 6 жарым мыңнан астамы көп балалы ана. Бұл жолғы алқа таққандардың болғандардың қатарында Жетісу облысының абыройын асқақтатып жүрген даңқты шабандоз Амангелді Хамзаның анасы Динара Бектенова да бар.
– Бізді үлкен құрметке бөлеп, осындай қолдау көрсетіп жатқан билік өкілдеріне айтар алғысымыз шексіз. Бүгін, міне, біраз аналарға алтынан, тағы біразымызға күмістен алқа тағып абыройымызды асқақтатып жатыр. Енді біз өмірге әкеліп, мәпелеп өсіріп отырған ұл қыздарымыздың білімді де білікті азамат болып, болашақта еліміздің дамуына еселі үлес қосады сенімдіміз»,–деп ризашылық білдірді көпшілік атынан сөз алған аналар.
Айдын КӘЛІМХАН
