Облыстық орман шаруашылығы және жануарлар дүниесі аумақтық инспекциясының 2026 жылғы 13 шілдедегі №69-н/қ бұйрығына сәйкес облыста күзгі аңшылық маусымы ашылды.
Аңшылық қызмет келесі мерзімдерде жүзеге асырылады:
- Сібір елігі, марал, тау ешкісінің аталығы үшін 15 шілдеден бастап, аналық пен төлдер үшін 15 қыркүйектен 31 желтоқсанға дейін;
- Қоян – 1 қарашадан бастап 31 қаңтар аралығында;
- Қаз, үйрек, қасқалдақ – қыркүйек айының бірінші сенбісінен бастап 15 желтоқсанға дейін;
- Қабан – қыркүйек айының алғашқы сенбісінен бастап 31 желтоқсанға дейін;
- Қырғауыл – 15 қарашадан бастап 31 желтоқсанға дейін.
Аңшылық қызмет «Аң аулау қағидаларын бекіту туралы» ҚР Ауыл шаруашылығы министрінің м.а. 2015 жылғы 27 ақпандағы №18-03/157 бұйрығы негізінде жүзеге асырылады.
ҚР Қызыл кітабына енгізілген жануарларды аулауға қатаң тыйым салынады. Сонымен қатар елді мекендерге жақын жерлерде, резервтік (қорғауға алынған) аумақтарда аң аулау жүргізілмейді.
Аң аулау ережесіне сәйкес олжалау мақсатында жануарлар дүниесі объектілерін іздеу, аңду, аң аулайтын алқаптарда дәрімен атылатын құндақталмаған қару немесе басқа да аңшылық құралдарымен, олжаланған жануармен, бос жіберілген аңшылық иттермен, аушы құспен жүру – аң аулауға шыққан болып есептеледі.
Аң аулау үшін келесі құжаттар болуы міндетті:
- аңшы куәлігі;
- жануарлар дүниесін пайдалануға берілген рұқсат;
- аңшылық шаруашылығы субъектісінің жолдамалары;
- аңшылық атыс қаруын қолданып аң аулаған кезде – азаматтық қару мен оның патрондарын сақтауға, сақтау мен алып жүруге жеке тұлғаларға берілген рұқсат;
- аушы жыртқыш құстармен аң аулаған кезде – аушы жыртқыш құстың паспорты болғанда жүзеге асырылады.
Аңшылық кезінде:
- авиа, авто-мото көлікті;
- ішімдік, есірткі және өзге де уландыратын заттарды;
- түнгі көздеп ату, дыбыссыз ату және лазермен дәлдеу құралдарын;
- жарық түсіретін құралдарды пайдалануға тыйым салынады.
Аңшылыққа шыққанда қоршаған ортаға деген жауапкершілікпен қарайық. Жерге тасталған кішкентай қалдық үлкен апаттың алғашқы ұшқынына айналуы мүмкін. Сөндірілмеген от, абайсыз тасталған темекі шоғындай ғана әрекет жануарлар мекенін күлге айналдырады.
Б. Ноғайбеков,
облыстық орман шаруашылығы және
жануарлар дүниесі аумақтық инспекциясының бөлім басшысы
