Алматы облысының таулы аймақтарында қар көшкіні жүруі мүмкін. Бұл туралы «Жетісу» газеті мәлімдеді.
Апатты жағдайды болдырмау мақсатында төтенше жағдайлар қызметкерлері «Қазселденқорғау» мекемесі мамандарымен Іле және Жоңғар Алатауы сілемдеріне аэровизуалды бақылау жүргізді. Зерттеу барысында қар жамылғысы тұрақсыз екені анықталды.
Таулы аймақта қар қалыңдығы 80 сантиметрге жеткен. Құтқарушылардың айтуынша елді-мекендерге тікелей келер қауіп жоқ. Алайда ауа температурасының көтерілуіне байланысты ақпан айының соңына дейін қар көшкіні жүруі мүмкін.
Тікұшақпен бақылау кезінде тау бөктерінде бірнеше жерде өздігінен қар көшкінінің жүруі тіркелді. Мамандар тұрғындарға тауға шығып, шаңғымен сырғанамауға кеңес береді.
— Зерттеу нәтижелері бойынша қазіргі уақытта таулы жерлерде қар жамылғысы тұрақсыз, елді мекендерге көшкіннен тікелей қауіп жоқ. Өзен арналарында сең кептелісі байқалмайды. «Қазгидромет» болжамы бойынша ауа температурасының көтерілуіне байланысты ақпан айының соңына дейін көшкін қаупі сақталады, — делінген Алматы облыстық төтенше жағдайлар департаменті баспасөз қызметінің хабарламасында.
«ЖЕТІСУ-АҚПАРАТ»
Сурет — ғаламтордан
