Талдықорған әкімдігі 30 миллион теңге қаражат жұмсап, бес қоғамдық әжетхана салған болатын. Алайда халыққа арналған нысанның есігі күні бүгінге дейін жабық тұр, тіпті, «ашылғанын да көрген жопыз» дейді тұрғындар.
Әрбір модульдік әжетхана 6 миллион теңгеге жуық қаржыға салынған. Олар қаланың халық көп жүретін жерлеріне орнатылған. Жергілікті биліктің айтуынша, әжетханаларды орналастыру үшін халық арасында сауалнама жүргізіліпті.
Жалпы ауданы 11 шаршы метр болатын «тазалық үйінде» екі кабина және техникалық бөлме бар. Олар шамдар, антивандалдық унитаздар, айна, қол жуатын раковина, қағаз ұстағыш сияқты керек-жарақтармен жабдықталған. Сонымен қатар, қол кептіргіштер, су жылытқыш (бойлер), қабырғаға ілінетін жылытқыш (электроконвектор), жаялық ауыстыратын үстел, тот баспайтын қоқыс жәшігі бар.
Бұған дейін әкімдік әжетханалар тегін қызмет көрсетеді деп мәлімдеген болатын. Бірақ, жергіліктік тұрғындар оның тегін еместігін ашып айтты. Тіпті, олардың кейбірі әлі су, кәріз және электр желісіне қосылмаған екен.
Талдықорған әкімдігі әжетханалардың тазалығы мен күтіміне 4,6 миллион теңге тағы бөлген. Бұл қаражатқа қызмет көрсететін мердігер компанияны анықтау үшін тендер жарияланған. Жеңімпаз мекеме бір жыл бойы бес дәретхананың тазалығы мен жұмысын қадағалайтын болады.
Бес дәретханаға бөлінген қомақты қаржы мен олардың әлі күнге дейін іске қосылмағаны халықтың ашуын туғызуда. Кейбірі тұрған оны «мұражайға» балап, құр ақша жұмсаудың әдісі деген баға беруде.
Мақпал Әділханқызы
Фото: baq.kz
Редакцядан: Аталған мәселеге байланысты Талдықорған қаласының әкімдігінен жауап күтеміз. Алдағы уақытта екінші тараптың да мәселеге қатысты көзқарасын еркін пікір алаңы ретінде назарларыңызға ұсынамыз.
