Бейсен Құранбек атындағы Журналистер үйінде балалардың терезеден құлауының алдын алу және қауіпсіздік мәселелеріне арналған баспасөз мәслихаты өтті.
Жетісу облыстық Төтенше жағдайлар департаментінің мәліметінше, биыл өңірде баланың терезеден құлауы бойынша 1 жағдайы тіркелген. Былтыр 3 оқиға орын алған.
Мамандардың айтуынша, қайғылы жағдайларға көбіне балалардың қараусыз қалуы, терезелерде қорғаныс құрылғыларының болмауы немесе олардың жарамсыздығы себеп болады.
Оқиғалардың алдын алу мақсатында облыста профилактикалық жұмыстар күшейтілген. «Қауіпсіз терезе» республикалық акциясы аясында 92 көпқабатты тұрғын үйде түсіндіру жұмыстары жүргізіліп, 860 пәтер қамтылды. Тұрғындарға балалар қауіпсіздігіне қатысты 780-нен астам жадынама мен ақпараттық кітапша таратылған. Сонымен қатар Көксу ауданындағы 11 мектепте жүргізілген жөндеу жұмыстары кезінде 700 терезе құлпы орнатылды. ТЖД бастамасымен Текелі қаласында салынып жатқан көпқабатты тұрғын үйлердің 60 пәтеріне 120 терезе қорғаныс құрылғылары қойылған. Мұндай жұмыстар Көксу ауданындағы жаңа тұрғын үй нысандарында да жалғасуда.
Жыл басынан бері әлеуметтік желілерде балалар қауіпсіздігіне қатысты 120 ақпараттық материал жарияланып, ата-аналарға арналған профилактикалық жадынамалар кеңінен таратылған.
Баспасөз мәслихатында журналистер екі апта бұрын бес қабатты тұрғын үйдің терезесінен құлаған сәби туралы сұрақ көтерді.
Жетісу облысының Балалардың құқықтарын қорғау басқармасының басшысы Абылай Жорабекұлының айтуынша, оқиға бойынша полицияға хабарлама түскен.
– Зардап шеккен бала 2025 жылы туған. Ата-анасы ажырасқан, қазіргі уақытта анасымен бірге тұрады. Бала бес қабатты тұрғын үйдің терезесінен құлап, қалалық ауруханаға жеткізілді. Бастапқыда жағдайы ауыр болып, жансақтау бөлімінде ем қабылдады. Дәрігерлер тиісті диагноз қойды, кеуде қуысы жарақатын алған, – деді басқарма басшысы.
Оның айтуынша, оқиға кезінде анасы үйде болмаған, бала нағашы әжесінің қарауында қалған.
– Анасы 2001 жылы туған. Мұндай жағдайларда бала қауіпсіздігіне қатысты жауапкершілік мәселесі қарастырылуы тиіс деп есептеймін. Өйткені баланың өмірі мен қауіпсіздігі үшін ең алдымен ата-ана жауапты, – деді Абылай Жорабекұлы.
Мамандар ата-аналарды балаларды қараусыз қалдырмауға, терезелерге арнайы қорғаныс құрылғыларын орнатуға және қауіпсіздік талаптарын қатаң сақтауға шақырды.
Аяулым Шынгаева
