Жетісу гарнизонына қарасты 18386 әскери бөлімінде жас сарбаздардың Әскери ант қабылдау рәсімі салтанатты түрде өтті. Ел қорғаны болуға бел буған отызға жуық жас сарбаз Қазақстан Республикасына адал қызмет етуге ант берді. Олардың барлығы – Жетісу облысынан мерзімді әскери қызметке шақырылған азаматтар.
Әскери ант қабылдау – әрбір сарбаздың өміріндегі ең маңызды әрі жауапты сәттердің бірі.Салтанатты рәсім әскери бөлімнің жауынгерлік туы алдында ұйымдастырылып, жас жауынгерлер ант мәтінін нық сеніммен және зор мақтанышпен оқыды.
Айрықша маңызды шараға сарбаздардың ата-аналары мен жақындары арнайы келіп қатысты. Ұлдарының ел алдындағы жауапты міндетті атқаруға қадам басқан сәтіне куә болған олар толқыныс пен мақтаныш сезімдерін жасырмады.
Мерекелік іс-шара барысында әскери қызметшілердің қатысуымен арнайы әскери көрсетілім ұйымдастырылды. Жиналған қауым жауынгерлердің саптық дайындық деңгейі мен әскери машықтарын тамашалады. Сонымен қатар патриоттық әндер орындалып, әскери рухты көтеретін концерттік бағдарлама ұсынылды.
Салтанатты рәсімнің шарықтау шегі әскери бөлімнің жеке құрамының саптық шеруі болды. Әскери тәртіп пен бірліктің үлгісін көрсеткен сарбаздар мен әскери қызметшілер мерекелік маршпен жүріп өтіп, көрермендердің ыстық ықыласына бөленді.
– Бүгіннен бастап жас сарбаздар Қазақстан Республикасының Қарулы Күштерінің толыққанды жауынгері атанып отыр. Олардың бойынан жауапкершілік пен патриоттық рухты көріп отырмыз. Отан қорғау – үлкен мәртебе әрі қасиетті міндет, – дейді 18386 әскери бөлім командирінің орынбасары подполковник Медет Алекеев.
Әскери ант қабылдау рәсімі жас жауынгерлердің әскери өміріндегі жаңа кезеңнің бастауына айналды. Енді олар жауынгерлік дайындықтарын жетілдіріп, еліміздің қауіпсіздігі мен тыныштығын қорғау жолында қызмет ететін болады.
Жетісу гарнизонының баспасөз қызметі
