Енді Қазақстанның әскери жоғары оқу орындарына түсу үшін eGov.kz порталы арқылы онлайн өтініш беруге болады. Бұл жаңашылдық үдерісті айтарлықтай жеңілдетіп, толықтай цифрландырылған қызметті ұсынады – өтініш беруден бастап нәтижені Жеке кабинеттен алғанға дейін бәрі онлайн жүзеге асырылады.
Электрондық жүйе азаматтың шектеулер мен соттылық бойынша жағдайын автоматты түрде тексереді. Егер үміткердің соттылығы болмаса, тиісті жауап небәрі 10 минут ішінде келеді.
ҚР Ұлттық қауіпсіздік комитеті тарапынан тексеру жүргізілуі үшін № 075 нысанды анықтаманы алдын ала алу және өмірбаянды дайындау ұсынылады. Сонымен қатар, мекенжай, фотосурет, туыстық байланыстар сынды көптеген деректер мемлекеттік дерекқорлардан автоматты түрде жүктеледі. Қалған ақпаратты үміткер қолмен толтыра алады.
Ұшқыш мамандығына түсетіндер үшін куәландыруға дейін 30 күннен аспайтын мерзімде алынған медициналық қорытынды қажет.
Қызмет көрсету мерзімі — 200 күнге дейін. Нәтиже eGov.kz порталындағы Жеке кабинетке келіп түседі.
Толық ақпарат пен құжаттар тізімі eGov.kz порталында қолжетімді.
«Жетісу-Ақпарат»
