Қазақстанда жолаушылар тасымалы саласын цифрландыру бағытындағы жұмыстар жалғасуда. Енді «Арай транс KZ» компаниясына тиесілі Астана – Семей – Достық бағытындағы №121/122 жолаушылар пойызында Starlink технологиясы негізіндегі спутниктік интернет қолжетімді болды, – деп хабарлайды 7-su.kz ақпараттық порталы.
Бұл – Қазақстандағы жеке тасымалдаушы қызмет көрсететін бағыттардың ішінде спутниктік интернетпен жабдықталған алғашқы пойыздардың бірі. Жоба Көлік министрлігінің жолаушыларға көрсетілетін қызмет сапасын арттыру және заманауи цифрлық шешімдерді енгізу жөніндегі бастамасы аясында жүзеге асырылды.
Спутниктік интернет жүйесін енгізуге теміржол саласындағы цифрлық және телекоммуникациялық шешімдермен айналысатын Kaztechnology инженерлік компаниясы атсалысты. Компания «Арай транс KZ» ЖШС-мен бірлесіп, аталған бағыттағы пойыздарды Starlink технологиясымен қамтамасыз етті.
Жаңа жүйенің басты артықшылығы – бұрын ұялы байланыс пен интернет қолжетімсіз болған теміржолдың шалғай учаскелерінде де тұрақты байланыс орнату мүмкіндігі. Соның арқасында жолаушылар сапар барысында интернет қызметін үздіксіз пайдалана алады.
Пойыздағы интернетке қосылу үшін жолаушылар Wi-Fi желісін таңдап, арнайы авторизациядан өтуі қажет. Қызмет екі түрлі форматта ұсынылады. Біріншісі – WhatsApp және Telegram мессенджерлері арқылы мәтіндік хабар алмасуға арналған тегін қолжетімділік. Екіншісі – әлеуметтік желілерді пайдалану, интернет-ресурстарды қарау, бейне сервистерді көру және жұмысқа қажетті қосымшаларды қолдануға мүмкіндік беретін ақылы тариф.
Қызмет ақысын Kaspi.kz, Halyk қосымшалары, сондай-ақ Apple Pay, Google Pay, Visa және MasterCard банк карталары арқылы төлеуге болады.
Көлік министрлігінің мәліметінше, спутниктік интернетті енгізу жолаушылардың жайлылығын арттырып, цифрлық қызметтерге қолжетімділікті кеңейтеді. Сонымен қатар теміржол көлігі қызметтерінің сапасын жақсартуға ықпал етеді. Ведомство алдағы уақытта да жолаушылар тасымалы саласына заманауи технологияларды енгізу жұмыстарын жалғастыратынын мәлімдеді.
