Қазіргі білім мен ғылым дамыған заманда өскелең ұрпақтың пайдалы өнертабыстары өте көп. Ақсу ауданында да талантты жастар аз емес. Солардың бірі — Тимур Брижанов Ж.Сыдықов атындағы орта мектептің 7-сынып оқушысы.
Ол 2020-2021 оқу жылынан бастап Ж.Сыдықов атындағы орта мектептің сайтын қолға алды. Мектептің сайты қазақ, орыс және ағылшын тілдерінде жасалған. Бұл сайтта «Біздің мектеп», «Байланыстар», «Галерея» сияқты бөлімдер бар. Сайттан оқушылар мен ұстаздар мектептің тыныс-тіршілігімен таныса алады. Мектепте болып жатқан соңғы жаңалықтар жарияланып тұрады. Мектеп директорының байланыс телефондарымен қатар мектептің әлеуметтік желідегі аккаунттарына сілтеме қойылған.
— Бұл сайттың пайдасына келер болсақ, мектепке жаңадан келетін оқушылар болса, мектеп туралы толық ақпарат алуға мүмкіндік бар. Болашақта онлайн кітапхана құру жоспарда бар. Мектептің сайтына QR-код арқылы кіру жоспарланып отыр. Сонымен қатар, сайтқа оқушылар мен ұстаздарға арналған чат құру жұмысы жүргізілуде, — дейді жас өнертапқыш.
Жас өрен осы жобасымен 2020-2021 оқу жылында аудандық «Менің Отаныма – менің бастамам» шығармашылық жобалар байқауында «Медиа жобалар» бағыты бойынша жүлделі І орынды алған. Облыстық «Менің Отаныма – менің бастамам» шығармашылық жобалар байқауында «Медиа жобалар» бағыты бойынша жүлделі ІІ орын иегері атанды.
— Тимур — біздің мектептегі дарынды оқушылардың бірі. Ол мектеп сайтын құрастырып жасаған. Сонымен қоса, санитарлық авиация саласында қолдану үшін тікұшақ макетін құрастырды. Осы жобасымен 2021-2022 оқу жылында «Ұлы өнертапқыштыққа алғашқы қадам» инновациялық идеялардың облыстық байқауынан «Авиация саласындағы жобалар» аталымы бойынша жүлделі 1 орын иегері атанып, республикалық байқауға жолдама алды. Тимурдың алар асуы, шығар белесі көп екеніне сенімдімін, — дейді жетекшісі, информатика пәнінің мұғалімі Гүлжан Құлынбаева.
«ЖЕТІСУ-АҚПАРАТ»
