Жетісу облысының Ескелді ауданында халыққа қызмет көрсету орталығында жөндеу жұмыстары жүргізіліп, кеңсе заманауи цифрлық жүйе форматында аудан тұрғындарына есігін қайта ашты. Мұнда 1300-ге жуық мемлекеттік қызмет көрсетіледі.
Бұл туралы сайтымыз «Азаматтарға арналған үкімет» Мемлекеттік корпорациясының облыс бойынша филиалы дерегіне сүйене отырып хабарлайды.
Цифрлық кеңселердің әдеттегі халыққа қызмет көрсету орталықтарынан басты айырмашылығы – соңғы үлгідегі құрал-жабдықтарымен қамтамасыз ету мен қызмет көрсетудің заманауи көзқарасын қалыптастыру.
«Халыққа қызмет көрсету бөлімі заман талабына сай цифрлық кеңсе ретінде ашылды. Кеңсе дизайны да өзгертілді,бұл қызмет алушылардың қызмет алу барысын жеңілдетіп, барынша ыңғайлы етеді. Мәселен, «күлгін түсті аймақта» тұрғындарға әлеуметтік қызмет көрсетілсе, “Жасыл аймағында” дайын құжаттар табысталады.“Сары аймақта” барлық қызмет түрі 20 минут ішінде көрсетіліп, «жылдамдық аймағы» ретінде белгіленген. Мысалы, оған туу туралы анықтама беру, неке қию туралы анықтама, жылжымайтын мүлікке құқықтарды мемлекеттік тіркеу сынды қызметтер кіреді. Жалпы ауданда 1295 қызмет түрі көрсетіледі, оның ішінде 1238-і электронды форматта жүргізіледі. Яғни, тұрғындар бұл қызметтерді электронды үкімет порталы арқылы да ала алады», – деп атап өтті «Азаматтарға арналған үкімет» Мемлекеттік корпорациясының облыстық филиал директорының м.а Абзал Омаров.
Естеріңізге сала кетейік, жаңа цифрлық кеңсе Ескелді ауданы, Қарабұлақ ауылы, Шестакова көшесі, 17 «А» мекенжайы бойынша орналасқан. Аудан тұрғындары жұмыс күндері 9.00-ден 18.00-ге дейін мемлекеттік қызмет ала алады.
