Алакөл ауданының әкімі Алмас Абдиновтың жылдық есеп беру сапары ауыл тұрғындары мен жергілікті басқару арасындағы сенімді нығайтуға бағытталған маңызды қадам болды. Үш күн ішінде 24 округтің тоғыз ауылын аралаған әкім 2025 жылдың тоғыз айында жүзеге асырылған жұмыстарды жан-жақты қорытындылап, алдағы міндеттерді нақтылады.
Тұрғындардың басты талаптары бұрыннан белгілі: ішкі жолдарды жөндеу, көшелерді жарықтандыру, медициналық пункт салу. Кездесу барысында ауыл тұрғындары осы мәселелердің барлығы толық шешілгенін айтып, ризашылықтарын білдірді. «Бұрын көшелер түнде мүлде қараңғы болатын, қазір жарықтандыру орнатылды, жүрісіміз жеңілдеді», – дейді Еңбекші ауылының ақсақалы Ақан Бисаринов.
Арқарлы ауылында да бірнеше ғимарат жөндеуден өтіп, тұрғындар жаңа ғимараттар салынғанына ризашылықтарын жеткізді. «Бар ғимараттарымызды жөндеп, жоқтарын салып, ішкі жолдарымызға назар аударып жатқандарыңызға алғысымыз шексіз. Облыстық маңызы бар жолымыздың жөндеуін де назарда ұстап, жұмыстарды жеделдетуіңізді өтінеміз», – деді Арқарлы ауылының тұрғындары.
Сонымен қатар Үшбұлақ, Тоқжайлау ауылдарының да тұрғындары облыстық маңызы бар жолдарды жөндеуді сұрады. Қайнар ауылының тұрғындары жастарды ауылда қалдыру мақсатында тұрғын үй мен мәдениет үйін салуды, ал Еңбекші ауылы спорт мектебін ашуды өтінді Әкім бұл өтініштерге назар аударып, «Мәдениет үйі мен спорт мектебінің құрылысын республикалық мониторинг нәтижесі бойынша уақытша тоқтатылған. Дегенмен, мүмкіншілік туса, бірінші кезекте осы ауылдарға салу мәселесін қарастырамыз», – деді.
Сапар барысында әкім халықпен ашық пікір алмасып, ауылдық өмірдің маңызды мәселелерін жеке бақылауына алды. «Біздің басты мақсат – әрбір ауылдағы тұрмыс сапасын жақсарту, тұрғындардың өтініштерін ескеру және шешімін табу», – деді Алмас Сапарғалиұлы.
Бұл үш күндік сапар ауыл мен билік арасындағы ашықтық пен сенімді нығайтып, алдағы уақытта ауылдық округтерде өмір сапасын жақсартуға бағытталған нақты шаралардың іске асырылуына мүмкіндік береді. Тұрғындардың пікірі тыңдалып, әрбір мәселе жеке бақылауға алынуы – жергілікті әкімдік пен халық арасындағы байланысты күшейтіп, ауданның әлеуметтік-экономикалық дамуына нақты үлес қосатыны сөзсіз.
