Шерзат ісінде айыпталған Азамат Тоқтаубаев сот отырысында өзіне тағылған айыптарға, өмір салтына және басқа күдіктілермен қарым-қатынасына қатысты жауап берді. Ол бұған дейін үйқамақта болғанын, тіпті бұлтартпау шарасын бұзғанын да мойындады.
2024 жылдың 17 қазанында ҚР ҚК 106-бабы 2-бөлігі 7-тармағы бойынша — бұзақылық ниетпен денсаулыққа қасақана ауыр зиян келтіру — айыпталған 24 жастағы Азамат Тоқтаубаев жеті жылға орташа қауіпсіздік колониясына сотталды. Бірақ үкім күшіне енгеніне қарамастан, оның нақты қашан қамауға алынғаны белгісіз.
Сот отырысында Тоқтаубаев өзге күдіктілермен қарым-қатынасы туралы да мәлімдеме жасады. Оның сөзінше, кейбіреуімен бала кезден таныс болса, кейбірімен жақында ғана араласқан:
«Тұрар Рысқұлов ауылынан болғасын Нұрқияс Ілиясов менің көршім болды. Бала кезімізден бірге өстік. Сакиев Равиль мен Ысқақ Думанды да бұрыннан танимын. Ал Дархан Әскентайды соңғы бір жылда ғана таныдым. Қалиахмет Дидармен де тығыз араласқан жоқпын», – деді Тоқтаубаев.
«Бұрын сотталғанмын, бірақ…»
Прокурор Дана Сәрсенбай сотталушының мінез-құлқын бағалауда оның бұрынғы құқықтық мәртебесінің маңызды екенін атап өтті. Бұл орайда Тоқтаубаев:
«Қазір жоғары сотқа арыз жазып жатырмын. Мен бұл сотты да жеңіп, ақталып шығамын», – деді ол сот залында.
Айта кетейік, Азамат Тоқтаубаевқа алғашында 2023 жылдың желтоқсанында ҚР Қылмыстық кодексінің 106-бабы 1-бөлігі (денсаулыққа қасақана ауыр зиян келтіру) бойынша айып тағылып, екі айға қамауға алынған болатын. 2024 жылдың ақпанында жәбірленушінің оның бұл іске қатысы жоқ екенін мәлімдеуіне байланысты үйқамаққа ауыстырылған. Кейін тергеу ісі 106-баптың 2-бөлігіне (аса ауыр зардаптарға әкелген әрекет) қайта сараланып, 2024 жылдың 17 қазанында сот үкімімен Тоқтаубаев 7 жылға бас бостандығынан айырылды.
