1 маусым – Халықаралық балаларды қорғау күніне орай Жетісу өңірінде ауқымды мерекелік шаралар өтеді. Биылғы бағдарлама Мемлекет басшысының тапсырмасымен республикалық бірыңғай Тұжырымдама аясында және «Цифрландыру мен жасанды интеллект жылы» шеңберінде ұйымдастырылады. Бұл жөнінде Жетісу облысы білім басқармасы басшысының орынбасары Қайрат Қасымов айтты.
Бастама негізінде 28-31 мамыр аралығында облыстың аудан-қалаларынан және «Айналайын» балалар үйінен іріктелген балалар Астана қаласына саяхатқа аттанды. Сапар барысында олар Ақорда резиденциясын аралап, «Alem.ai» халықаралық жасанды интеллект орталығының жұмысымен танысты. Одан бөлек, өңірде есепте тұрған осындай санаттағы 891 баланың құқығын қорғау мақсатында «Отбасы банкпен» бірлесіп, тұрғын үй кезегіне қою процесі толық автоматтандырылды.
Мереке қарсаңында облыс, қала және аудан әкімдері мен депутаттардың қатысуымен «Бала үні» диалог алаңдары ұйымдастырылуда. Тұрғындар «Бір сәтке әкім» рөлдік ойыны аясында өңірді дамытуға қатысты өз ұсыныс-пікірлерін ашық айту мүмкіндігіне ие болады.
Ал 1 маусым – мереке күні «Бақытты балалық үшін» акциясы аясында Талдықорғандағы «Жеңіс саябағында» және барлық аудан орталықтарында ауқымды бағдарламалар өтеді. Оның шеңберінде мерекелік концерттер, спорттық және ұлттық ойындар, ғылыми-шығармашылық көрмелер, «Заң және тәртіп» локациясы, асфальтқа сурет салу конкурстары мен қуыршақ театрының қойылымдары ұйымдастырылады. Бұл шаралардың барлығы балалардың қауіпсіздігін қамтамасыз етуге және олардың цифрлық заманда үйлесімді дамуына жағдай жасауға бағытталған.
«Жетісу-Ақпарат».
