Қоғам дертіне айналған жемқорлық мемлекеттік органдардың тиісті қызмет атқаруына кері әсер етіп, беделіне нұқсан келтіруде. Салдарынан азаматтардың конституциялық құқықтары мен заңды мүдделері бұзылды. Қазақстан Республикасының «Сыбайлас жемқорлыққа қарсы күрес туралы» Заңына сәйкес сыбайлас жемқорлықпен күресті барлық мемлекеттік қызметкерлер мен лауазымды тұлғалар жүргізуі тиіс.
«Қоғамның зиянды әрі қауіпті жауы – жемқорлық. Ол ең алдымен әділетсіздікке, кейін бүкіл жүйенің құлауы мен тоқырауына әкеледі» депті Платон. Жемқорлықтың мемлекет үшін ең ауыр салдары – экономиканың дамуына кері әсер етіп, халықтың құқықтық сенімін төмендетеді, әлеуметтік әділетсіздік пен теңсіздіктің күшеюіне әкеледі.
Дегенмен, жең ұшымен жалғасқан бұл қылмысты түп-тамырымен жойып жіберу, өкінішке қарай, мүмкін болмай тұр. Тамыры ұзаққа созылған сыбайлас жемқорлық, әсіресе, білім ошақтары мен ауруханаларда, мемлекеттік қызмет органдарында кең етек алған. Сондықтан да жемқорлыққа қарсы негізгі іс-шараларды дәл осы орындарда жүргізіп, оның тиімді атқарылуына жіті көңіл бөлген жөн. Жоғары оқу орындарында студенттерден ақша алу, ауруханаларда ауруларға тегін берілетін дәрі-дәрмекті сату, операцияларға заңсыз қаржы талап ету сияқты оқиғалар жиі тіркеліп жатады.
Мемлекетіміздің әрбір азаматы Конституцияны және заңдарды сақтауға, басқа адамдардың құқықтарын, бостандықтарын, абыройы мен қадір-қасиетін құрметтеуге міндетті.
Қысқасы, жемқорлық – Қазақстан үшін ең күрделі және өткір мәселенің бірі. Оның шешілуі тек мемлекеттік деңгейде ғана емес, бүкіл қоғамның күш-жігерін талап етеді. «Жемқорлықты жеңу үшін оған қарсы күресетін адамның өзінде адалдық пен әділдік болуы тиіс» деп Авраам Линкольн айтқандай, адалдық пен әділдік орнамай, жемқорлықты жоя алмаймыз.
Ернар АЗИМБАЕВ
Жетісу облысының жеке сот орындаушысы
