Мемлекет басшысының Қазақстан халқына Жолдауында «Таза Қазақстан» экологиялық акциясы туралы айтылып, экологиялық мәдениетті дамытудың 2024-2029 жылдарға арналған тұжырымдамасы бекітілді. Экологиялық мәдениетті қалыптастыру «Адал адам – адал еңбек – адал табыс» патриотизм құндылықтарын дәріптеу, сондай-ақ қоршаған ортаға ұқыпты қараудың бастамасы.
Расында, жер шарындағы тұрғындар санының өсуі, өндіріс, ауылшаруашылық саласының дамуы, судың, ылғалданудың жетіспеушілігі, ормандардың оталуы, мал азығын дайындайтын жерлерді құнарландырып, баптау жұмыстарының жүргізілмеуі сияқты көптеген жағдайлар қоршаған ортаға өз әсерін тигізіп жатыр.
Айналамыздың көркі болған жасыл желек тал-дарақтарды басты байлығымыз деп танып, қорғап осылай жанашырлық танытып тұрсақ ең сауапты істі жасаған болар едік. Өйткені, өзімізді қоршаған тіршілік ортасын келешек ұрпаққа бүлдірмей, ластамай, көркейтіп, көріктендіріп жеткізу біздің басты парызымыз. Ең бастысы, айналаға көрік беріп, тыныс алып жүрген ауамызды тазартып тұратын тіршілік көзінің жасыл желек болып жайқалғаны. Бағзы заманнан жасыл желектің көл-көсір пайдасын білген халқымыз:«Атадан мал қалғанша, тал қалсын» деп ұрпағына ағаш отырғызудың маңыздылығын айтып кеткен. Табиғатты аялап, қоршаған ортаға жанашырлық көзқарас таныту адамзаттың басты борыштарының бірі екендігін ұғындырған. Біз осыны басты назарда ұстауымыз керек.
Аталған бастаманы «Жоңғар-Алатауы» мемлекеттік ұлттық табиғи паркі үлкен қызығушылықпен атқарды. Сарқан ауданының мектептерінде бүгінгі таңда 13 мектеп және 2 колледж бойынша 3015 контейнер қайың, бозарша, кәдімгі шырша, жөке ағаштарының тұқымдары себілді. Жыл бойы акцияға 679 адам қатысты. Осы мақсатта мектеп оқушылары мен колледж студенттері аталған акция аясында себілген тұқымға күтіп-баптау жұмысын жүргізу жалғасуда.
Жақсылық ИГІМАН
Сарқан ауданы
