Қазақстанда бидай егісінің қысқаруы ішкі нарықтағы ұн мен нан көлеміне кері әсер етпейді. Бұл туралы Үкімет отырысында Ауыл шаруашылығы министрі Айдарбек Сапаров мәлімдеді.
Министрдің айтуынша, соңғы екі жылда мономәдениетке тәуелділікті азайту мақсатында бидай алқаптары 750 мың гектарға қысқарған. Алайда өнімділіктің артуы бұл өзгерістің теріс әсерін жойған.
«Біз майлы және бұршақ дақылдарының көлемін арттырып жатырмыз. Былтыр рекордтық астық жиналды. 12 млн тонна астықты экспорттауды жоспарлап отырмыз. Шілде айына дейін 8,9 млн тоннасы сыртқа шығарылады», – деді министр.
Сапаровтың мәліметінше, қазіргі таңда тек шаруаларда ғана емес, Азық-түлік корпорациясында да жеткілікті көлемде астық қоры бар.
«Қорымызда жарты миллион тонна астық бар. Бұл келесі егінге дейін толық жеткілікті», – деп сендірді ол.
Еске сала кетейік, бұған дейін елімізде егіс науқанын жеделдету ұсынылған болатын.
