Талдықорған жоғары медициналық колледжі 90 жылдық мерейтойын атап өтті. Ілияс Жансүгіров атындағы Мәдениет сарайында ұйымдастырылған салтанатты шараға медицина саласының өкілдері, ардагер ұстаздар, түлектер мен колледж ұжымы қатысты.
Жиында сөз алған облыстық денсаулық сақтау басқармасының басшысы Асқар Садықов колледждің медицина кадрларын даярлаудағы жетістіктерін атап өтті.
1936 жылы небәрі 30 адамға арналған медбикелер даярлау курстарынан басталған оқу орны бүгінде 10 мыңнан астам маман түлетіп, Жетісу облысының денсаулық сақтау саласының дамуына елеулі үлес қосып келеді. Мемлекеттік қолдаудың арқасында колледждің материалдық-техникалық базасы нығайып, студенттерге қолайлы жағдай жасалуда. Соңғы жылдары заманауи спорт залы мен 280 орынды жатақхана пайдалануға берілді. Еңбек нарығының сұранысына сай жаңа мамандықтар ашылып, білім беру бағдарламалары жетілдірілуде. Соның ішінде инклюзивті қоғам қалыптастыру аясында массаж мамандарын даярлау қолға алынған. Бүгінде колледж сұранысқа ие мамандар даярлап, қолданбалы бакалавриат бағдарламаларын жүзеге асыруда.
Шара барысында оқу орнының бұрынғы директоры Серік Жансеңгіровке Қарағанды медицина университетінің Петр Поспелов атындағы «Құрметті профессор» атағын беру туралы құжат табысталды. Ол колледжді отыз жылға жуық басқарып, оның дамуына және беделінің артуына зор үлес қосты. Мерейтойда оқу орнының дамуына үлес қосқан ардагер ұстаздарға құрмет көрсетілді.
Олардың қатарында 30 жыл бойы оқу-тәрбие ісі жөніндегі директордың орынбасары қызметін атқарған Эльза Ли, Мира Мақашева, Нелли Мухаметова, Ғалия Тлеуберлина, Татьяна Дудукина, Надежда Крысина, Людмила Кенжегарина және Бахыт Мұқашева бар. Колледж түлектерінің арасында бүгінде өңірдің денсаулық сақтау саласында жауапты қызмет атқарып жүрген мамандар аз емес. Атап айтқанда, облыстық санитарлық-эпидемиологиялық бақылау департаментінің басшысы Асхат Чарапиев, Текелі қалалық ауруханасының директоры Ертай Тілеутайұлы, облыстың штаттан тыс бас психиатры Алексей Тищенко және «Eva Med» медициналық орталығының жетекшісі, дәрігер-гинеколог Евгения Успанова.
Мерекелік жиын концерттік бағдарламамен аяқталды.
Гүлжан ТҰРСЫН
