Талдықорғандағы Jetisu Digital IT хабының базасында «Summer GDG AI Hackathon» жазғы хакатоны өтіп, жас өнертапқыштар жасанды интеллект технологияларына негізделген тың жобаларын ұсынды. Шараның басты мақсаты – өңір жастарының цифрлық құзыреттерін дамыту, бағдарламалау дағдыларын жетілдіру, командалық жұмыс мәдениетін қалыптастыру және инновациялық идеяларды нақты технологиялық өнімдерге айналдыруға қолдау көрсету.
Облыстық цифрлық технологиялар басқармасының қолдауымен ұйымдастырылған хакатон Google Developers Group (GDG) Taldykorgan қауымдастығы өткізген байқау барысында қатысушыларға тапсырмалар іс-шараның ашылуынан кейін ғана беріліп, командалар шектеулі уақыт ішінде өз шешімдерін әзірледі.
Jetisu Digital IT хабының аймақтық менеджері Әйгерім Шаймерденованың айтуынша, мұндай жобалар өңірлік IT экожүйені дамытуға, халық- аралық стандарттарды енгізуге және цифрлық трансформацияға үлес қосатын жаңа буын мамандарын даярлауға мүмкіндік береді. Сонымен қатар қатысушылар тәжірибе алмасып, кәсіби байланыстарын нығайтады.
Хакатон аясында қатысушылар үшін бұлтты технологияларға арналған тәжірибелік воркшоп ұйымдастырылды. Google компаниясының Катардағы кеңсесінің бағдарламалық жасақтама инженері Удеш Удаякумар Google Cloud сервистерінің мүмкіндіктері мен оларды заманауи цифрлық өнімдерді әзірлеуде қолдану жолдарын таныстырды.
Хакатонға 30-ға жуық оқушы мен студент қатысты. Олардың қатарында Талдықорғаннан бөлек, Алматы мен Астана қалаларында білім алып жүрген жастар да бар.
Қатысушылардың бірі – Талдықорған колледжінің түлегі Сағындық Мырзағали хакатондардың кәсіби дамудағы маңызына тоқталып, мұндай жарыстардың қысқа уақыт ішінде жоба әзірлеуге, жылдам шешім қабылдауға және командалық жұмысты жетілдіруге үлкен мүмкіндік беретінін атап өтті.
Ұйымдастырушылардың пікірінше, «Summer GDG AI Hackathon» Жетісу жастарының жасанды интеллект пен цифрлық технологияларға қызығушылығының жылдан-жылға артып келе жатқанын айқын көрсетті.
Байқау қорытындысында 1-орынды «Medos» жобасы иеленді. Бұл жүйе жедел жәрдем қызметі, емханалар мен ауруханалар арасындағы өзара іс-қимылды автоматтандыруға бағытталған. 2-орын компьютерлік көру технологиялары арқылы Паркинсон ауруын диагностикалауға арналған «Neuromotion» жобасына бұйырса, 3-орынды психикалық денсаулық саласында жасанды интеллект мүмкіндіктерін пайдаланатын «Ahead» жобасы жеңіп алды. Оларға дипломдар мен естелік сыйлықтар және ақшалай сертификаттар табыс етілді.
Еңлік Кенебай
