Облыс әкімі Бейбіт Исабаев Италияның Қазақстандағы Төтенше және Өкілетті Елшісі Антонелло Де Риумен кездесті. Аймақ басшысы қонақтарды жылы қабылдап, кездесу екіжақты бірлескен ынтымақтастықты нығайтуға ықпал ететініне сенім білдірді.
Биыл 30 мамырда Италия Премьер-Министрі Джорджа Мелони Қазақстанға ресми сапармен келіп, Мемлекет басшысы Қасым-Жомарт Тоқаевпен кездескен. Бұл сапар екіжақты ынтымақтастықты дамытудағы айтулы оқиға болды. Италия Қазақстанның әлемдегі сауда серіктестерінің үштігіне енді.
Бейбіт Исабаев итальяндық делегацияны жылы қарсы алып, Антонелло Де Риуды Қазақстандағы дипломатиялық миссиясының басталуымен құттықтады. Облыс әкімі қонақтарды облыстың әлеуметтік-экономикалық дамуының негізгі бағыттарымен қысқаша таныстырды.
– Облыс республикада жетекші орын алады. Жалпы облыста агроөнеркәсіптік кешенді дамыту, көлік-логистика, туризм, баламалы энергетика және өнеркәсіп, оның ішінде жер қойнауын пайдалануды дамыту сияқты 5 стратегиялық бағыт бойынша жұмыстар жүргізілуде. Жетісу – аграрлы аймақ. Біз облыста өндірілетін ауыл шаруашылығы өнімдерінің 65 пайызын қайта өңдеп, ішкі мүмкіндіктерді одан әрі кеңейтуге, өнімдерді өңдеуге, заманауи агро және суды үнемдейтін технологияларды пайдалануға ден қойып отырмыз. Логистика және транзит саласында үлкен әлеует бар.«Батыс Еуропа – Батыс Қытай» трансконтиненталдық автожолы мен автодәлізі аймақ арқылы өтіп, жүкті Қытайдан Еуропаға 10 күнде жеткізуге мүмкіндік береді. Өңірдің көлік-логистикалық әлеуетін дамытуға географиялық тұрғыдан тиімді орналасқан «Қорғас – Шығыс қақпасы» еркін экономикалық аймағы ықпал етеді. Оның Құрамына құрғақ порт, жалпы ауданы 5 мыңға жуық логистикалық және индустриялық аймақтар кіреді. Мұнда көліктің барлық негізгі түрлерін қамтитын көп форматты әуе, теміржол және автомобиль логистика дамып келеді, – деді аймақ басшысы.
5 бағытқа негізделген өңірдің туристік әлеуетіне ерекше мән берілетінін айтқан облыс басшысы Алакөл мен Балқаш көлдерінің жағасында жағажай туризмін, «Жоңғар-Алатау» және «Алтын-Емел» ұлттық саябақтарында экологиялық туризмді, Жоңғар Алатауының тау жүйесі аумағында тау туризмін дамыту бойынша атқарылған жұмыстарға тоқталды. Болашақта ниет білдірген италиялық инвесторлармен жұмыс істеуге барлық мүмкіндік қарастырылғанын тілге тиек етті.
Италияның Қазақстандағы Төтенше және Өкілетті Елшісі Антонелло Де Риу қазақтың қонақжайлылығына, ерекше құрмет көрсеткен аймақ басшысына алғыс айтты. Ол бұл кездесу екі ел арасындағы ғылым мен жоғары білім саласындағы ынтымақтастықтың жарқын көрінісі екенін атап өтті.
– Жетісу жерінің табиғаты көз тартады. Бізді Талдықорғандағы индустриялық аймақ сияқты ерекше жоба қызықтырады. Болашақта біз италиялық әрбір кәсіпкер Қазақстанда сенімді серіктес таба алатын платформа құрғымыз келеді. Италияның туризм саласында мол білімі мен тәжірибесі бар. Біз болашақта спалы қызмет көрсетуге қабілетті жоғары білікті мамандарды дайындап, Жетісудың туристік инфрақұрылымын дамытуға ықпал ете аламыз, — деді.
Іскерлік кездесуді қорытындылай келе екі тарап бұл сапар екіжақты қарым-қатынастарды одан әрі нығаятынын, түрлі салаларда нақты бірлескен жобаларды жүзеге асыруға мүмкіндік беретініне сенім білдірді.
Еңлік КЕНЕБАЙ
