Қазақстанның энергетика секторында ауқымды жаңғырту жұмыстары жалғасуда. Орталық коммуникациялар қызметінде өткен баспасөз конференциясында Энергетика вице-министрі Сұңғат Есімханов энергетика секторын жаңғырту шаралары туралы баяндады, – деп хабарлайды 7-su.kz ақпараттық порталы.
2025 жылы атқарылған жұмыстар еліміздің энергетикалық қуатын едәуір арттыруға мүмкіндік берді. Өткен жылы электр станцияларында 10 энергоблок, 63 қазандық және 39 турбинаға жөндеу жүргізілді. Электр желілері бойынша 17 мың шақырым желі мен 420 қосалқы станция жөнделді. Жылу желілерінде 323 шақырым құбыр ауыстырылды. Қабылданған шаралардың нәтижесінде электр энергиясын өндірудің тарихи ең жоғары көрсеткіші 17 273 МВт-қа жетті. Аталған көрсеткіш өткен жылыту маусымымен салыстырғанда 7 пайызға жоғары. Жылу электр орталықтарының тозу деңгейі 64 пайыздан 61 пайызға дейін төмендеді.
Биылғы жөндеу науқаны аясында электр станцияларында 9 энергоблок, 55 қазандық және 51 турбинаға жөндеу жүргізу жоспарланған. Электр желілерінде 17,1 мың шақырым желі мен 444 қосалқы станцияны жөндеу көзделген. Жылу желілерінде 377 шақырым құбырды ауыстыру жоспарланған. Жаңарту шаралары тозу деңгейін қосымша 61 пайыздан 59 пайызға дейін төмендетуге мүмкіндік береді. Отынмен қамтамасыз ету мәселесіне ерекше назар аударылды. Энергонысандардың отын қоймаларында 4,7 млн тонна көмір жинақталған, аталған қор өткен жылмен салыстырғанда 7 пайызға жоғары. Барлық нысандарда нормативтік отын қоры қамтамасыз етілген.
Ағымдағы жылыту маусымында коммуналдық-тұрмыстық сектор мен халықтың көмірге деген қажеттілігі 7,46 млн тоннаны құрайды. Бүгінгі күні 7,68 млн тонна немесе жылдық жоспардың 103 пайызы дайындалды. Энергетика министрлігі күзгі-қысқы кезеңнің тұрақты өтуін қамтамасыз ету бойынша жұмысты жалғастырады. Конструктивті журналистика принциптеріне сәйкес, инфрақұрылымды жаңарту апаттардың алдын алуға және сапалы қызмет көрсетуге бағытталған.
