Мемлекет басшысы Қасым-Жомарт Тоқаевтың еліміздің бас газетінің директоры Дихан Қамзабекұлымен сұхбаты халықтың көкейінде кептеліп қалған көптеген сауалдың жауабын таратып берді.
Ең бастысы, Қаңтар оқиғасының алғышарттары мен әлі жалғасып келе жатқан салдарларын: «Мен 2019 жылы Президент болып сайланғаннан кейін мемлекетіміз саяси жүйені демократияландыруға, қоғамдық өмірге еркіндік сипат беруге, экономиканы монополиядан арылтуға бет бұрды. Ашығын айтсам, осы жаңа бағдарымыз кейбір ықпалды адамдарға мүлде ұнаған жоқ. Олар бұл өзгерісті елімізде әбден тамыр жайған жүйеге және билік құрылымындағы өздерінің «ерекше мәртебесіне» төнген қатер деп қабылдады. Мұндай адамдар елдегі өзгеріске астыртын, кейде тіпті ашық қарсылық білдіре бастады. Ақыр соңында реформаның бетін қайтарып, өздеріне ыңғайлы бұрынғы қалыпқа оралу үшін бәрін тас-талқан етуге шешім қабылдады.
Жоғары лауазымды тұлғалардан тұратын бұл топтың күштік құрылымдарға да, қылмыс әлеміне де орасан зор ықпалы болды. Сондықтан билікті күшпен басып алуға бел буды. Тергеу мәліметтеріне жүгінсек, олар 2021 жылдың ортасына таман дайындыққа кіріскен», – деп ашып көрсетті!
Анығы сол, мемлекеттік төңкеріс дайындығы жарты жылдан астам уақыт бұрын қолға алынған екен. Елдің барлық өңірлерінде дерлік қам жасалған. Сонда деймін-ау, Қауіпсіздік Кеңесінің Төрағасы қайда қарап отырған? Тіпті, білмей қалды дегеннің өзінде қанды оқиға бел алған күндері ел алдына неге шықпады? Президентіміздің жанынан неге табылмаған? Әліптің артын бағып отырған-ау?! Алаңда ойнақ салған әсіредіншілдерді бүгінгідей ата салтымызға, қазақы қалпымызға қарсы қашанғы үргіземіз? Қаңтар қырғынының басты дем берушісі қашан анықталады? – деген секілді сан сұрақ санамызды тілгілеп отыр қазір де!
«Қаскөйлердің мемлекеттік төңкеріс жасамақ болған жоспарын жүзеге асыру үшін экстремистер, қылмыстық топтар және әсіре діншілдер бірге қимылдады. Олардың мақсаты ел ішіне үрей туғызу, мемлекеттік институттардың қызметін тұралату, конституциялық құрылымның іргесін шайқау, ақыр соңында билікті басып алу еді.
Маған бас сауғалап, резиденциядан кету, тіпті, шетел асу туралы ұсыныс бірнеше рет айтылды. Бірақ мен бұған үзілді-кесілді қарсы болдым», – деп ақиқатты алға тартты Президентіміз! Ал сол Отанын сатқан, халқын жерге қаратқан қаскөйлердің басым бөлігі ешқандай жазаға тартылмастан әлі күнге арамызда талтаңдап жүргенін қалай түсінеміз? Бүге-шегесіне дейін тексеретін уақыт жетті емес пе?! Бұл «халық көтерілісі, тіпті революция» деп жалған пікір таратып жүргендер де солар! «Жауды аяған – жаралы!» Кімнен тайсақтаймыз, кімнен қорқақтаймыз?!
«Мың өліп, мың тірілген» халқымыз қандай сынақ келсе де елдесе тойтарыс берген, бүгін де беруге даяр! Жаумен кескілесе шайқасып жүріп жан тапсыруды бәрінен де артық санаған бабаларымыздың аманатын арына балаған саналы ерлеріміз ел ішінде жетерлік! Тәуелсіздігімізді қорғап, қасиетті жерімізді келер ұрпаққа кенішті де келісті күйінде тапсыру – асыл мұрат, басты борышымыз! Сол себепті де, кешегі Қаңтарда «еркек тоқты құрбандық» деп, халқы үшін басын бәйгеге тіге мемлекеттігімізді сақтап қалған Президентіміз Қасым-Жомарт Тоқаевпен біргеміз! Болаттай берікпіз, Рухтыларға серікпіз!
Әміре Әрін,
Алматы облысының Құрметті азаматы
