Қазақстанда 2025 жылдың басынан бері 326,3 мың тонна нан өндірілді, – деп хабарлайды 7-su.kz ақпараттық порталы.
Өткен жылы елімізде 510,1 мың тонна нан пісірілсе, биылғы жылдың сегіз айындағы көрсеткіш – 326,3 мың тонна. Нан зауыттарының өндірістік қуаты жылына 457,4 мың тоннаға жетеді.
Өнімнің басым бөлігі – бидайдан пісірілген қалыпты нан. Оның үлесі жалпы ассортименттің шамамен 60 пайызын құрайды. Сонымен қатар, қысқа және ұзақ мерзімге сақталатын тоқаштар мен кондитерлік өнім түрлері де көбейіп келеді.
2021–2030 жылдарға арналған агроөнеркәсіптік кешенді дамыту тұжырымдамасы аясында ауыл шаруашылығы өнімдерін қайта өңдейтін кәсіпорындарға мемлекеттік қолдау қарастырылған. Жылына 2 мың тоннадан астам нан немесе кондитерлік өнім өндіретін кәсіпорындарға инвестициялық шығындардың 25 пайызы өтеледі.
Бұдан бөлек, ұн өндірушілер үшін салықтық жеңілдіктер бар. Салық кодексінің 411-бабына сәйкес, бұл саладағы қосылған құн салығының мөлшерлемесі 70 пайызға төмендетілген.
Бүгінде Қазақстандағы нан өндірісі ішкі нарықтағы қажеттілікті толық қамтып отыр. «Егіс даласынан – дүкен сөресіне дейін» жалғасатын тұрақты өндіріс тізбегі арқылы халық күн сайын сапалы әрі қолжетімді нанмен қамтамасыз етіледі.
