«Қазгидромет» РМК-ның мәліметінше, бүгін еліміздің бірқатар қалаларында атмосфералық ауаның ластану деңгейі артуы мүмкін, – деп хабарлайды 7-su.kz ақпараттық порталы.
Синоптиктердің болжамына сәйкес, қолайсыз метеорологиялық жағдайлар Өскемен, Семей, Атырау, Ақтөбе, Талдықорған және Алматы қалаларында күтіледі. Сондай-ақ түнгі уақытта Астана қаласында да осындай жағдай қалыптасуы ықтимал.
Мамандар мұндай кезеңдерде атмосфераның төменгі қабатында зиянды заттардың жиналуы күшейетінін атап өтеді. Бұл құбылыс көбіне тымық ауа райы, әлсіз жел, тұман және ауа инверсиясы сияқты қысқа мерзімді метеорологиялық факторлармен байланысты.
Сала мамандарының айтуынша, мұндай қолайсыз жағдайлар кезінде атмосфералық ластану деңгейінің көтерілуі тұрғындардың денсаулығына кері әсер етуі мүмкін, әсіресе тыныс алу жолдарына қатысты шағымдар жиілейді.
