Қазақстанда халықтың тұрмысын жеңілдетуге бағытталған тағы бір маңызды цифрлық жоба сәтті жүзеге асырылды. Бұдан бұлай еліміздегі әрбір азамат үшін электрондық жеке медициналық кітапша сервисі толықтай қолжетімді, – деп хабарлайды 7-su.kz ақпарттық порталы.
Денсаулық сақтау министрлігі ұсынған ресми ақпаратқа сәйкес, жаңа инновациялық сервис eGov Mobile және Halyk мобильдік қосымшаларына толық интеграцияланған. Сондықтан тамақ өнеркәсібі, білім беру, қызмет көрсету секілді декреттелген салада еңбек ететін қызметкерлер үшін құжатты қағаз түрінде жанында тасып жүру қажеттілігі келмеске кетті. Ұялы телефондағы электрондық медициналық кітапша сервисін ашып, экранды көрсету жеткілікті.
Бұл жаңашылдық тек тұрғындарға ыңғайлылық сыйлап қана қоймай, медициналық тексеруден өту үдерісінің ашықтығын қамтамасыз етеді. Санитариялық-эпидемиологиялық қызмет енді міндетті медициналық тексерулердің уақытылы өтуін қашықтан бақылау мүмкіндігіне ие. Егер қызметкердің медициналық тексеру мерзімі өтіп кеткені жүйеден анықталса, оны жұмыстан уақытша шеттету бойынша жедел шаралар қабылданады. Осылайша, жалған медициналық анықтамалар жасау мен жемқорлық қаупін біржола жоюға жол ашылды.
Елімізде алғаш рет санитариялық-эпидемиологиялық қызметтің бірыңғай цифрлық экожүйесі құрылды. Ол өз ішіне бірнеше негізгі бағытты біріктіреді:
-
Мемлекеттік бақылау: Санитариялық-эпидемиологиялық қадағалау сапасын арттырады;
-
Медициналық тексерулер: Декреттелген кәсіп иелерінің тексерулерін орталықтандырады;
-
Зертханалық зерттеулер: Анализ қорытындыларын бірыңғай базада сақтайды;
-
Өндірістік бақылау: Кәсіпорындардың санитарлық талаптарды сақтауын қадағалайды;
-
Вакцинация мониторингі: Екпе алу барысын цифрлық форматта бақылауда ұстайды.
Цифрлық медициналық кітапша – бұл заманауи технологиялардың адам өмірін жеңілдетудегі нақты көрінісі. Уақытыңызды үнемдеп, медициналық құжатыңызды мобильді қосымшадан алдын ала тексеріп қойыңыз!
