Облыс бойынша жыл басынан бері мас күйде көлік басқарған 99 адам ұсталды. Ең сорақысы, ішімдік ішіп көлік жүргізгендердің қатарында мемлекеттік қызметшілер де бар. Бұл туралы мемлекеттік қызметшілердің Әдеп кодексінің талаптарын сақтаудың түйінді мәселелері бойынша өткізілген семинарда айтылды.
Облыстық әкімдікте өткен жиынды облыс әкімі аппаратының Әдеп жөніндегі уәкілі Ғабит Тұрсынбай жүргізіп отырды. Семинарда 4 мәселе қаралды. Есірткі, психотроптық заттарды, олардың аналогтарын тұтыну, көлік құралын масаң күйде басқарудың зияны туралы облыстық полиция департаменті әкімшілік практика бөлімінің бастығы Олжас Отаров, есірткі қылмысына қарсы іс-қимыл басқармасының аға жедел уәкілі Меруерт Ысқақова баяндады.
– Көлікті масаң күйде басқарғаны үшін жүргізуші 15 тәулікке әкімшілік қамауға алынып, 7 жыл мерзімге көлік құралын басқару құқығынан айырылады. Облыс бойынша жыл басынан бері масаң күйде көлік басқарған 99 адам ұсталды. Былтыр 500-ден астам адам тіркелген. Олардың ішінде мемлекеттік қызметкерлер де бар. Мәселен, жуырда көлікті ішімдік ішіп жүргізген Қаратал ауданы әкімдігінің бас маманы ұсталды. Заң қанша күшейіп, полиция қызметкерлері алдын алу шараларын ұйымдастырса да жүгенсіз жүргізушілер азаяр емес, – дейді Олжас Рысбайұлы.
Осыдан кейін облыс әкімінің гендерлік теңдік мәселелері бойынша штаттан тыс кеңесшісі Римма Салықова «Мемлекеттік органдарда әйелдерге қатысты кемсітушілікті және жыныстық қудалауды болдырмаудың маңыздылығы» тақырыбында баяндама жасады. Өз кезегінде ҚР сыбайлас жемқорлыққа қарсы іс-қимыл агенттігі облыстық департаменті превенция басқармасы басшысының орынбасары Бақытжан Өмірбеков «Заң мен тәртіп. Мемлекеттік қызмет саласындағы сыбайлас жемқорлыққа қарсы іс-қимыл және оның алдын алу бағытындағы іс-шаралар», облыстық дін істері басқарамасының дінтанушы, психологы Қанат Мүтебаев «Мемлекет қызметшілердің деструктивті діни ағымдар қызметіне араласудың алдын алу» тақырыбында сөйледі.
Жиында өзекті мәселелер кеңінен талқыланып, Әдеп кодексін сақтау – мемлекеттік қызметшінің міндеті екені айтылды.
Айдар ҚАЛИЕВ
