Мен өнер академиясында драматургия пәнінен дәріс беріп жүргендіктен Мемлекет басшысы Қасым-Жомарт Тоқаевтың Жолдауын оқу орнының үлкен жиынжайында студенттермен бірге отырып тыңдадым. Қалай дегенмен де, биылғы Жолдау осыған дейін естіп келе жатқан Жолдаулардан ерекше болды. Оны жастардың әр тұста қошеметтеп, қол шапалақтауларынан анық аңғаруға болатын еді. Шынымен бұл жолы естігіміз келген жайды естідік.
Ең бастысы – территориялық тұтастығымыз бен мызғымас тәуелсіздігімізді қамтамасыз ету жайындағы айтылған сөздер менің жүрегіме жетті. Шекарасы бекімеген Украинадағы соғыс біздің бұл мәселеге ерекше назар аударуымызды талап етеді. Осы орайда Президенттің: «Мені, ең алдымен, халқымның болашағы қандай болатыны толғандырады. Қызметіме түрлі адамдардың беретін бағасынан гөрі мемлекетімізді қорғап қалу – мен үшін аса маңызды міндет. Осы жолда жауапкершіліктің бәрін мойныма алуға дайынмын!» — деген сөздері иландырады.
Кешегі қанды қаңтардың себеп-салдары әлі де ашыла жатар. Алайда Жолдауда Президент бұл оқиғаның да көлеңкелі тұстарына жарық түсіріп, бүлікті ұйымдастырушылардың мақсаты мен есімдері әшкереленгенін айтып кетті. Болашақта осындай қателіктерге ұрынбаудың жолдарын ойластырып, қоғамды бірлікке, ынтымаққа шақырғанымыз әлдеқайда дұрыс болар еді.
Қазақстанда жаңадан үш облыстың ашылуы да өте құптарлық іс болды деп есептеймін. Осы өңірлерді аралай жүріп бір кездері жайқалып тұрған қалалар мен ауылдардың тоз-тозы шыққанын сан рет көргенбіз. Енді өз алдына отау құрған облыстар дамудың даңғылына түседі деп сенгім келеді. Жаңа облыстардың Абай, Ұлытау және Жетісу аталуы да жүрегімізге жылы тигені жасырын емес.
Еліміздегі саяси жүйені реформалау қажет екенін баршамыз біліп жүрдік. Осыны Президент өз Жолдауында нақтылы айтып өтті. Мемлекет басшысының, Конституциялық сот пен орталық сайлау комисиясы мүшелерінің партиялардан тысқары болуы, барлық партиялардың мүмкіндігі бірдей болу қажеттігі өте әділ шешім деп есептеймін.
Екі саяси-экономикалық жүйеде өмір сүріп, еңбек еткен біз үшін таң қалатын дүние қалмағандай көрінуі мүмкін. Дегенмен, биылғы Жолдаудың мазмұнында жаңа бір леп бар екенін байқадық. Мемлекет басшысының сөзінде елдің болашағына деген үлкен сенім, үнінде күш-қуат барын аңғардық.
Президент Жолдауын барша халықпен бірге қаламгерлер қауымы да қолдайтынына сенімдімін. Жаңа Қазақстан – тәуелсіздігі мызғымас Мәңгілік Ел болу үшін Президентті қолдап, жұмыла еңбек етуге шақырамын!
Дулат ИСАБЕКОВ,
жазушы-драматург
