Мемлекет басшысы Қасым-Жомарт Тоқаевтың тапсырмасына сай биыл елімізде «Жұмысшы мамандықтары жылы» деп жарияланғаны анық. Осыған байланысты Жетісу облыстық мәдениет басқармасының бастамасымен аймақтағы әр аудан, қала кітапханаларында «Еңбекпен ер атанған» көш керуен жобасы қолға алынуда.
Аталған мәдени шара Талдықорған қаласына қарасты Мойнақ ауылындағы №6 кітапханада жалғасын тапты. Ауылдық мәдениет үйінде өткен іс-шарада «Еңбек – елдің тұтқасы» тақырыбында арнайы кітап көрмесі ұйымдастырылды. Көрмеге аса көрнекті мемлекет және қоғам қайраткері Дінмұхамед Ахметұлы Қонаевтың елі үшін сіңірген ерен еңбектері, социалистік еңбек ерлері Нұрмолда Алдабергенов, Зылиха Тамшыбаева туралы жазылған кітаптар мен «Жетісудың жұлдызы», «Жер туралы жыр» сынды жыр жинақтары қойылған.
Еске сала кетсек, ел Президенті Қасым-Жомарт Кемелұлы:
– Адал әрі табанды еңбегімен табысқа жеткен адамдар қашанда құрметті, сыйлы болуы керек. Бұл «Адал азамат – Адал еңбек – Адал табыс» қағидатына толық сай келеді. «Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді»,– деп айрықша атап айтқан еді .
Жиналған ауыл тұрғандары алдында сөз алған Талдықорған қалалық кітапханасының басшысы Күлпан Сейітжанова көш керуен жобасының негізгі мақсаты – еңбек адамдарының жетістіктерін дәріптеу, жастарды адалдыққа және жауапкершілікке тәрбилеу, жұмысшы мамандықтарының тарихы мен заманауи мүмкіндіктерін таныстыру екенін жеткізді.
– Кітап – рухани қазына, адам жан дүниесінің жауһары. Бүгінгі көш керуен жобасының қарапайым мамандық иелері үшін де, оқырман қауымы мен жастар үшін де маңызы зор. Себебі, бұл шарадан жастар кітап оқуға шабыт алып, ұлт мақтанышына айналған ұлы тұлғалардың өмірбаян, еңбектерімен танысады. Ал қарымды қаламгерлеріміздің еңбегі елге дәріптеледі. Мен ес білгелі осы кітапты азық етіп, жастанып жатып оқитын кітапқұмар оқырмандардың бірімен. Жалпы кітап адамның ой-өрсін кеңейтіп, білімін шыңдайтын бірден бір құрал болғандықтан, мұндай шараларды жиі өткізіп тұрудың көпке тигізетін көмегі зор,– дейді ауыл ақсақалы, оқырман Темірбек Тынышбаев.
Шара соңы жұмысшы мамандарының құрметіне арналған өңір өнерпаздарының концерттік бағдарламасына ұласып, мың бұралған билер орындалып, әсем сазды әндер шырқалды.
Айдын КӘЛІМХАН
