Алматы облысында перзентхана қызметкерлері мінген шағын автобус аударылып қалды. Бұл туралы «Жетісу» газеті хабарлады.
«Талғар — Есік — Бәйдібек би» тас жолында келе жатқан Mercedes-Benz Sprinter жүргізушісі Сатай ауылының маңында көлік тізгініне ие бола алмай қалған. Күн тұман, жол көктайғақ болған.
— Таңғы сағат 07.40 кезінде Еңбекшіқазақ аудандық полиция бөліміне «Талғар — Есік — Бәйдібек» тас жолының 72-ші шақырымында жол-көлік оқиғасы тіркелгені туралы ақпарат түсті. Оқиға орнына тергеуші жедел топ қызметкерлері бірден шықты. Белгілі болғанындай, 41 жастағы жүргізуші тұман мен көктайғақ жағдайында рульге ие бола алмай, көлік аударылған, — деп хабарлайды Алматы облысының полиция департаментінің баспасөз қызметі.
Жол апаты салдарынан үш адам травматологиялық бөлімге жеткізілді. Дәрігердің тексеруінен кейін 19 адам үйіне қайтарылды.
«ЖЕТІСУ-АҚПАРАТ»
