«Жетісу медиа» ақпараттық алаңында өткен брифингте аймақтағы экологиялық мәселелерді шешу, су қорғау аймақтары мен белдеулерін белгілеу, қатты тұрмыстық қалдықтарды реттеуге қатысты әңгіме өрбіді.
Облыстық экология департаментінің бөлім басшысы Ерасыл Бекжановтың айтуынша, былтыр ластайтын заттар шығарындыларының көлемі 13,3 мың (жылдық лимит 45,1 мың), төгінділердің көлемі 5,1 мың (жылдық лимит 5,9 мың), қалдықтарды жинау 90,2 мың (жылдық лимит 237,7 мың) қалдықтарды көму 104,2 мың (жылдық лимит 5125,8 мың) тоннаны құрады. Демек, нәтижелі жұмыс атқарылды деуге дәлел жеткілікті. Осыншама жұмысты жүргізу және қоршаған ортаны қорғау шараларына жергілікті бюджеттен 65,0 млн. теңге бөлінген. Өткен жылы 48 нысанға алдын ала жүргізілген бақылау барысында заң бұзушылықтар анықталып, барлығына нұсқама берілген және айыппұл салынған. Зертханалық-аналитикалық бақылау бөлімі 5 су нысанына тексеру жүргізіпті. Демек, облыстық департамент экологиялық ахуалды қалыпты деңгейде ұстап тұру үшін барын салуда.
Аймақта бүгінде 500-ден астам су объектісі бар, оның ішінде ұзындығы 50 шақырымнан асатын 100-ден астам өзен: Балқаш, Алакөл, Сасықкөл, Жалаңашкөл, Қошқаркөл, Алтай, Рай көлдерін де жатқызуға болады. Облыстық табиғи ресурстар және табиғатты пайдалануды реттеу басқармасының бөлім басшысы Қанат Дәуренбековтің айтуынша, былтыр облыстағы 29 өзенге су қорғау аймақтары мен белдеулері белгіленіп, 31,5 млн. теңге игерілген. Биыл 29 су объектісіне, су қорғау аймақтары мен белдеулерін белгілеу жұмыстары жүргізіледі.
Облыстық энергетика және тұрғын үй-коммуналдық шаруашылығы басқармасының бөлім басшысы Әлібек Әділбаевтің айтуынша, облыста жыл сайын 220 мың тонна қалдық жиналады. Олар 182 (412 га.) уақытша жинау орны мен 7 (85 га.) полигонға тасылады. Тұрмыстық қалдықтарды жинау мен шығаруды 24 ұйым жүзеге асырады.
Бүгінде Алакөл, Қаратал және Талдықорған қалаларының полигондары экологиялық рұқсат алса, Ескелді, Кербұлақ, Көксу және Панфилов аудандарындағы полигондар экологиялық рұқсат алу үшін тиісті жұмыстар жүргізілуде. Бұдан басқа аудан, қалалардағы коммуналдық қалдықтарды басқару бойынша «ГеоДатаПлюс» ЖШС 18,5 млн. теңге сомасына бағдарлама әзірлеген. Сондай-ақ, былтыр қоршаған ортаны қорғау саласындағы қызметтің тиімділігін арттыру үшін Үшарал, Сарқан қалалары үшін 2 полигон салуға және Текелі қаласындағы жабық полигонды рекультивациялауға 97,6 млн. теңге бөлініпті.
«Жасыл Даму» АҚ-ға қалдықтарды қайта өңдеу саласындағы 3 инфрақұрылымдық жоба (Көксу, Панфилов ауданы және Талдықорған қаласы) бойынша жалпы кредиттеу сомасы 2,1 млрд. теңгеге өтінімдер берілген. Текелі қаласы, Ескелді және Көксу аудандарын қамтитын Талдықорған кешенді алаңын (полигон) құру жоспарлануда. Бұл жүзеге асқанда полигонда қалдықтардың жиналуы жылына 60 мыңнан 110 мың тоннаға дейін артатын болады. Дегенмен, тұрғындар өз бетімен қоқыс төгіп кететін жағдай жиі кездеседі. Сол үшін «Ғарыш Сапары» атты мониторинг жүргізіледі. Нәтижесінде, былтыр 243 орын анықталып, толығымен жойылған.
«Таза Қазақстан» республикалық экологиялық акциясына 251 мыңнан астам адам қатысып, 12,8 мың тонна қоқыс шығарылып, 2465 шақырым арық желісі тазаланып, 57,2 мың м2 автомобиль жолдарына ағымдағы жөндеу жұмыстары жүргізіліпті.
Қажет АНДАС
Фото: ecolog-ua.com
