Бүгін облыс әкімі Бейбіт Исабаев ҚР Су ресурстары және ирригация министрі Нұржан Нұржігітовпен кездесіп, бірқатар келелі мәселелерді талқылады. Жиынға әкімдік пен министрлік өкілдерімен қатар «ҚазақМыс Холдинг» ЖШС басшылығы да қатысты, — деп хабарлайды Жетісу облысы әкімінің баспасөз қызметі.
Алдымен Су ресурстары және ирригация министрінің Жетісу облысындағы сапарын тілге тиек еткен облыс әкімі бүгінгі жиынның күн тәртібіндегі мәселелерге тоқталды:
— Жетісудың Кербұлақ ауданында «Шоғырландырылған құрылыс тау-кен компаниясы» серіктестігі тау-кен байыту кешенінің құрылысы жобасын қолға алды. «Көксай» кен орнын дайындау жобасының облыс үшін ғана емес, республика көлемінде маңызы үлкен. Оны жүзеге асыру өңірдің әлеуметтік-экономикалық дамуына, халықтың әл-ауқатын арттыруға оң ықпал ететін болады. Қазіргі кезде қажетті өндірістік инфрақұрылыммен қамтылған тау-кен металлургия кешенінің жобасы жасалып жатыр. Құрылысын 2024 жылы бастау жоспарланған. Осыған байланысты жобаны іске асыру барысындағы экологиялық талаптардың сақталуын бүгін бірге талқылап, ортақ шешімге келеміз деп ойлаймын, — деді Бейбіт Исабаев.
Мұнан соң сөз алған «ҚазақМыс Холдинг» ЖШС Директорлар кеңесінің төрағасы Эдуард Огай аталған жоба туралы қысқаша баяндап берді.
— Жоба 7 жыл көлемінде кезең-кезеңімен іске асырылады. Жобаға 1,3 трлн. теңге инвестиция салу жоспарланып отыр. Жалпы саны 2 мыңнан астам жұмыс орны ашылады. Кешен жылына 50 млн. тонна кен өндіретін қуаттылыққа ие болады, — деді ол.
Сонымен қатар Көксай кен орны гидрологиялық жағынан күрделі жерде орналасқандықтан, жобада экологиялық шешімдер де қарастырылған. Атап айтқанда, Қоғалы өзенінің саласын сақтап қалу және лайлануын болдырмау үшін инвесторлар бірнеше гидротехникалық құрылыс салуды жоспарлап отыр. Осыған байланысты жобадағы экологиялық талаптарды сақтау мәселесінде компания тиісті ведомствомен арада нақты келісімдерге қол жеткізуге ниетті.
Өз кезегінде Су ресурстары және ириигация министрі Нұржан Нұржігітов облысқа келген сапарында аралап көрген нысандары және шаруалармен бірге талқылаған мәселелері жөнінде қысқаша айтып өтті. Сондай-ақ бүгінгі көтеріліп отырған мәселе – Көксай кен орны жобасына орай «ҚазақМыс Холдинг» басшылығымен бұған дейін де бірнеше рет жолығып, осы мәселелерді пысықтағанын жеткізді.
— «Көксай тау-кен байыту комбинатының» құрылысы — еліміз бойынша әлеуметтік маңызы бар жоба. Бұл орайда компанияның ұсынып отырған экологиялық шешімдерін жан-жақты қарастырып, министрлік деңгейінде нақты қорытынды жасайтын боламыз, — деді Н. Нұржігітов.
Облыс әкімі ауқымды жобаны су шығынын болдырмай, су сапасына зиян келтірмей және жалпы экожүйені сақтай сақтай отырып іске асырудың маңыздылығын атап өтіп, өзекті мәселені бірлесіп талқылауға қатысқан азаматтарға ризашылығын білдірді.
Жетісу облысы әкімінің баспасөз қызметі.
Фотосуреттер авторы: Жеңіс Ысқабай
