Қазақстанда электр желілеріндегі апатты жағдайлар азайып келеді. Энергетика министрлігінің мәліметінше, 2025 жылы ел бойынша ауқымды жаңғырту және жөндеу жұмыстары жүргізіліп, оның нақты нәтижесі байқалған, – деп хабарлайды 7-su.kz ақпараттық порталы.
Ресми дерекке сәйкес, өткен жылы 17 мың шақырым электр беру желілері мен 420 қосалқы станция күрделі жөндеуден өтіп, соның нәтижесінде электр желілерінің тозу деңгейі 66%-ға дейін төмендеген. Бұл көрсеткіш саладағы ұзақ жылдан бері қордаланған мәселенің кезең-кезеңімен шешіліп жатқанын аңғартады.
Министрлік өкілдері жаңғырту жұмыстарының тиімділігі нақты көрсеткіштермен дәлелденіп отырғанын айтады. Атап айтқанда, электр желілеріндегі апаттылық деңгейі 13%-ға азайып, 3140 технологиялық бұзушылықтың алдын алуға мүмкіндік туған. Мұндай өзгерістер энергетикалық инфрақұрылымның сенімділігін арттыруға бағытталған жүйелі шаралардың нәтижесі ретінде бағаланып отыр.
Биыл да бұл бағыттағы жұмыстар жалғасады. Жоспарға сәйкес, тағы 17 мың шақырым электр желісін жаңарту көзделген. Өңірлер бойынша алғанда, Ақмола облысында 2,5 мың шақырым, Павлодар облысында 2,4 мың шақырым, ал Жамбыл және Ұлытау облыстарында 1,8 мың шақырымнан астам желі жөнделмек. Бұл – елдің әр аймағында электрмен қамту сапасын теңестіруге бағытталған қадам.
Сонымен қатар 444 қосалқы станцияны, 3,4 мың тарату пункті мен трансформаторлық қосалқы станцияларды жаңғырту жоспарланған. Ауқымды жұмыстарды іске асыру нәтижесінде электр желілерінің орташа тозу деңгейін қосымша 65%-ға дейін төмендету көзделіп отыр.
Сала мамандарының пікірінше, бұл шаралар электрмен жабдықтаудың сенімділігін арттырып қана қоймай, елдің энергетикалық жүйесінің тұрақтылығын күшейтуге мүмкіндік береді.
