Қазақстан неврологиялық аурулары бар пациенттерге диагностика, емдеу және күтім көрсетуге қолжетімділікті жақсартуға, олардың өмір сүру сапасын арттыруға бағытталған Дүниежүзілік денсаулық сақтау ұйымының (ДДҰ) сектораралық жаһандық іс-қимыл жоспарын іске асыруға қосылады, – деп хабарлайды 7-su.kz ақпараттық порталы.
Бұл бастаманың өзектілігі әлемде және елімізде неврологиялық аурулардың таралу деңгейінің артуымен тікелей байланысты болып отыр. Қазіргі таңда Қазақстанда Паркинсон ауруына шалдыққан пациенттер санының өсуі байқалады. Сонымен қатар инсульт, деменция, эпилепсия, созылмалы бас аурулары және диабеттік нейропатия азаматтар арасындағы неврологиялық мүгедектіктің негізгі себептерінің қатарында қалып отыр. Ми саулығын нығайту – қоғамның әл-ауқатын арттырудың басты кепілі.
Астана қаласында Дүниежүзілік денсаулық сақтау ұйымы Қазақстан Республикасы Денсаулық сақтау министрлігімен бірлесіп «Неврологиялық жағдайлар – қоғамдық денсаулық сақтаудың басымдығы: эпилепсия және басқа да неврологиялық бұзылыстар жөніндегі ДДҰ-ның 2022–2031 жылдарға арналған сектораралық жаһандық іс-қимыл жоспарын енгізуді жеделдету» атты ұлттық семинар өткізуде.
Семинарда қаралатын негізгі мәселелер:
-
Жүйені жетілдіру: Мемлекеттік органдар, халықаралық ұйымдар және медициналық қауымдастық өкілдері науқастарға көмек көрсетудің жаңа тетіктерін талқылайды;
-
Қаржыландыру мен кадрлар: Салалық қызметтерді міндетті әлеуметтік медициналық сақтандыру (МӘМС) жүйесіне толық интеграциялау және білікті мамандар даярлау;
-
Сандық инновациялар: Ақпараттық жүйелерді дамыту және ел көлемінде неврологиялық аурулардың ұлттық тіркелімін құру.
Ауқымды іс-шара қорытындысы бойынша Қазақстанда ДДҰ-ның Жаһандық іс-қимыл жоспарын іске асыру жөніндегі ұлттық жол картасына нақты ұсыныстар әзірленіп, сектораралық өзара іс-қимылдың алдағы қадамдары айқындалады. Бұл семинарды өткізу өңірдің денсаулық сақтау жүйелерін нығайтуға бағытталған Орталық Азиядағы денсаулық пен әл-ауқатты қолдау жөніндегі жол картасының мақсаттарына толықтай сай келеді.
