Қазақстанда жасөспірімдердің ерте жастан қаржылық тәуелсіздікке ұмтылуына заң жүзінде мүмкіндік ашылды. Енді 14 жасқа толған жеткіншектер ресми түрде жеке кәсіпкер (ЖК) ретінде тіркеліп, өз бизнесін дөңгелете алады, – деп хабарлайды 7-su.kz ақпараттық порталы.
Кәсіпкерлік кодекске сәйкес, жасөспірімдердің өз ісін жүргізуіне ешқандай құқықтық кедергі жоқ. Алайда 18 жасқа толмаған азаматтар үшін басты шарт – ата-анасының немесе заңды өкілдерінің жазбаша келісімі болуы керек. Егер мұндай келісім болмаса, мәселе қорғаншылық органдарының шешімі немесе сот арқылы жасөспірімді «толық әрекетке қабілетті» деп тану (эмансипация) негізінде шешіледі.
Тіркелу процесі барынша цифрландырылған. Жас кәсіпкерлер келесі құралдар арқылы өтініш бере алады:
-
Екінші деңгейдегі банктердің мобильді қосымшалары;
-
e-Salyq business арнайы платформасы.
Бүгінгі таңда жастар арасында мобилография, SMM-менеджмент, графикалық дизайн және IT салалары қарқынды дамып келеді. Осы бағытта қызмет көрсететін жасөспірімдер үшін жеке кәсіпкер ретінде тіркелу – табысын заңдастырудың және ірі компаниялармен келісімшарт жасасудың тиімді жолы. Бұл қадам жастардың цифрлық сауаттылығын арттырып, еңбек нарығындағы жауапкершілікті ерте сезінуіне септігін тигізеді.
Жаңашылдыққа қатысты халықтың пікірі екіге жарылды. Кейбір ата-аналар 14 жасты «тым ерте» деп санап, балалардың алаяқтардың құрығына түсіп қалуынан қауіптенеді. Дегенмен, сарапшылар бұл бастаманы қолдауда. Олардың пайымдауынша, егер бала өз бетімен өнім жасап немесе қызмет көрсетіп ақша тауып жүрсе, оны заңды арнаға бұру мемлекет үшін де, жеке тұлға үшін де пайдалы.
Мамандар кәсіпкерлікке қадам басқан жасөспірімдерге алдымен салық режимін дұрыс таңдап, қаржылық сауаттылық негіздерін меңгеруге кеңес береді. Бұл болашақта үлкен бизнеске жол ашатын алғашқы маңызды тәжірибе болмақ.
