Елімізде кәсіби мерекелердің ресми тізімі жаңартылып, тағы бес жаңа атаулы күнмен толықты. Бұл туралы ҚР Еңбек және халықты әлеуметтік қорғау министрлігі бекіткен жаңа бұйрық ҚР нормативтік құқықтық актілерінің эталондық бақылау банкінің электрондық порталында жарияланды, деп хабарлайды 7-su.kz ақпараттық порталы.
Жаңа құжатқа сәйкес, кәсіби мерекелер қатарына келесі бес мамандық иелеріне арналған күндер қосылды:
-
7 шілде – Қазақстан қолөнершілер күні;
-
9 шілде – Табиғи монополиялар саласы қызметкерлерінің күні;
-
15 қыркүйек – Санитарлық-эпидемиологиялық қызмет мамандарының күні;
-
20 қазан – Қоғамдық тамақтану саласы қызметкерінің күні;
-
29 қазан – Қазақстан кәсіпкерлері күні.
Осылайша, жаңартылған тізім бойынша елімізде барлығы 74 кәсіби мереке ресми түрде белгіленіп отыр. Бұл өзгеріс – түрлі салаларда еңбек етіп жүрген азаматтардың қоғамдағы рөлін тану және олардың еңбегін құрметтеу бағытындағы маңызды қадамдардың бірі болып саналады.
