Оқушылардың басқа елді мекендерге спорттық жарыстарға баруы полицияның бақылауымен жүзеге асуы тиіс. Бұл туралы ҚР Премьер-министрі Олжас Бектенов мәлімдеді, деп хабарлайды 7-su.kz ақпараттық порталы.
Үкімет басшысының айтуынша, бұған дейін спорттық жарыстарға қатысуға шыққан оқушылардың жол апатына ұшырап, қайғылы жағдайларға душар болған фактілері бар. Осыған байланысты Бектенов қауіпсіздік шараларын күшейтуді тапсырды.
«Тиісті келісімдер мен рұқсаттарсыз, сондай-ақ патрульдік полицияның ілесуі болмаса, спорттық жарыстарға баратын оқушылардың елді мекеннен тыс жерлерге шығуына тыйым салынуы тиіс», – деді Премьер-министр Үкімет отырысында.
Сондай-ақ, Олжас Бектенов министрліктер мен өңір әкімдіктеріне жазғы демалыс кезеңінде балалардың қауіпсіздігін қатаң бақылауда ұстауды тапсырды.
«Барлық ұйымдастыру жұмыстары 1 маусымға дейін толық аяқталуы керек. Жазғы маусым басталғанға дейін мүдделі мемлекеттік органдар су айдындарында, орман-тоғайларда және жолдарда қауіпсіздік пен тәртіп ережелерін түсіндіруге бағытталған ауқымды ақпараттық жұмыстар жүргізуі қажет», – деді ол.
Үкімет басшысы бұл жұмыстардың басты мақсаты – балалардың өмірі мен денсаулығын қорғау екенін атап өтті.
