Шымкент қаласының қылмыстық істер жөніндегі мамандандырылған ауданаралық сотында қала әкімінің орынбасары Руслан Берденовке жасалған қастандық ісі қаралып жатыр, деп хабарлайды 7-su.kz ақпараттық порталы.
Алдын ала тыңдалым барысында прокурор Бауыржан Қараманов айыптау актісін жария етті. Іс материалдарына сәйкес, 2025 жылғы 21 сәуірде айыпталушы Ернар Жиембай Шымкент қаласы Құрылыс басқармасы жанындағы салынып жатқан нысандарға мониторинг жүргізу бөлімінің басшысынан ақпарат алған. Сол арқылы ол Берденовтің тапсырмасымен «Тұрғын үй Шымкент» ЖШС директоры қызметінен кетуі тиіс екенін білген.
Прокурордың айтуынша, осы мәліметтен кейін Жиембайда қала әкімінің орынбасарына қастандық жасау ниеті туындаған. Эмоционалдық күйде дүкеннен ішімдік алып, оны көлігінде ішкен. Кейін үйіне барып, «Сайга» маркалы аңшы мылтығын алған және біраз уақыт бойы оны жұбайына тиесілі көліктің жүксалғышында сақтаған.
Кешкісін күдікті әкімдік ғимаратының маңына барып, Берденовті күткен. Оны көрген бойда бес рет оқ атқан. Жәбірленуші құлағаннан кейін, Жиембай бақылау үшін жақындап тағы атпақ болған. Алайда алған жарақатына қарамастан, Руслан Берденов қарсылық көрсетіп үлгерген.
Осы сәтте әкім орынбасарының жүргізушісі араласып, шабуылдаушыны көлігімен қағып, кісі өлтірудің алдын алған.
Қылмыстық іс ҚК-нің 24-бабы 3-бөлігі және 99-бабы 1-бөлігі бойынша («Кісі өлтіруге оқталу») қаралуда. Негізгі сот отырысы 6 тамыз күні сағат 10:00-де өтеді.
