Төтенше жағдай кезінде халықтың қауіпсіздігін қамтамасыз ету мақсатында эвакуациялық жинау және зардап шеккендерді қабылдау пунктінде практикалық жаттығу өтті. Шара Құлжабай Қасымов атындағы №28 IT мектеп-лицейінде ұйымдастырылды.
Төтенше жағдай төнгенде мектепте 1800 адамды қабылдауға мүмкіндік бар. Барлығына жатын орын қарастырылған. Сонымен қатар, медициналық және психологиялық көмек көрсетіледі. Ыстық тамақ та беріледі.
– Төтенше жағдай орын алса біз оқушыларымызды эвакуациялап ата-аналарына табыстаймыз. Зардап шеккен халықты қабылдаймыз. Төтенше жағдай пунктінің басшысы ретінде мен қызметкерлерімді жинап, талаптармен таныстырамын. Одан кейін қаланың эвакуация қызметімен байланыс орнатып, зардап шеккендерге көмектесеміз, – дейді мектеп директоры Қаракөз Әбдірахманова.
Облыс бойынша құрылған 235 пунктте 35 мың адамды қамтуға мүмкіндік бар. Ал Талдықорған қаласы бойынша 31 пункт дайындалған. Олардың басым бөлігі мектеп пен әкімшілік ғимараттар.
– Жұртшылық қауіпсіздік пункттерін алдын ала білген жөн. Зардап шеккен халықты қабылдайтын пункт ТЖД-ның ресми сайтында көрсетілген. Сонымен қатар, көпқабатты тұрғын үйлер мен қоғамдық орындарда арнайы кодтар қойылған. Оны сканерлеу арқылы эвакуациялық пункттердің картасын көруге болады, – деді облыстық ТЖД азаматтық қорғаныс басқармасының офицері Азамат Қақашов.
Айдар ҚАЛИЕВ
Суретті түсірген Жұмабай МҰСАБЕК
