Белгілі ғарышкер, Халық қаһарманы Талғат Мұсабаевты ақтық сапарға шығарып салу рәсімі 2025 жылғы 6 тамызда өтеді. Бұл туралы 7-su.kz ақпараттық порталы «Қарулы Күштер ардагерлері» республикалық қоғамдық бірлестігінің Алматы қалалық филиалына сілтеме жасап хабарлады.
Қоштасу рәсімі Алматы қаласындағы Офицерлер үйінде сағат 09:00-де басталады. Кейін 28 гвардияшы-панфиловшылар атындағы саябақта митинг ұйымдастырылады. Ғарышкердің денесі Кеңсай зиратына жерленеді.
Еске сала кетейік, Талғат Мұсабаев 2025 жылғы 4 тамызда, 74 жасқа қараған шағында өмірден өтті.
Талғат Мұсабаев туралы деректер
Талғат Амангелдіұлы Мұсабаев 1951 жылы 7 қаңтарда Алматы облысы Жамбыл ауданында дүниеге келген. Ол — кеңестік және қазақстандық ғарышкер, үш мәрте ғарышқа ұшқан, техника ғылымдарының докторы (2008), авиация генерал-лейтенанты (2007), Халық қаһарманы.
Мемлекеттік қызметте де белсенді болған Талғат Мұсабаев:
-
2007–2016 жылдары Қазақстан Ұлттық ғарыш агенттігінің төрағасы қызметін атқарды;
-
2017–2023 жылдары ҚР Парламенті Сенатының депутаты болды.
