Талдықорған қаласындағы Тіл сарайында аймақтағы дін басшыларының қорытынды жиыны өтті. Басқосуда Қазақстан мұсылмандары діни басқармасының Жетісу облысы бойынша бас имамы Керімбек Дәуітов өңірдегі аудан, қалалардағы мешіт ұстаздарынның құнды ой-пікірлерін тыңдап, бас мүфти Наурызбай қажы Тағанұлының тапсырмасына сай атқарылған істерге баға берді.
Жиында сөз алған облыстық Дін істері басқармасының басшысы Сағыныш Жаңабай Жетісу жеріндегі мешіт қызметкерлері тарапынан жасалып жатқан жұмыстарды жоғары бағалады. Әрі олардың дәстүрлі ислам дінін кеңінен дәріптеп, береке-бірлікті бекемдеп, жастарға тура жол нұсқауда, халықты ізгі имандылыққа шақырып, қайырымдылық жасауда қосқан зор үлестері үшін алғыс айтып, алдағы істеріне сәттілік тіледі.
Бас имам Керімбек Сәрсембайұлының сөзінше, қазір мешіт имамдары күнделікті уағыз-насихат жұмыстарын жүргізумен қатар, көптеген игілікті істерге ұйытқы болуда. Мәселен, өткен жылы өңір имамдарының бастамасымен су тасқынынан зардап шеккен облыстарға 11 миллион теңгеден астам қаржылай, 56 тонна азық-түлік және басқа да қажетті заттар жөнелтілсе, Қазақстан мұсылмандары діни басқармасының бастамасымен құрылған «Зекет» қорының «Ел үлесі – пәтерге» жобасы шеңберінде 14 мұқтаж адамға баспана тарту етілген. Сондай-ақ, «Мектепке жол» акциясы аясында 1200-ден астам оқушы киім-кешек басқа да қажетті заттармен қамтылса, білім алушы шәкірттерге 1 миллион 700 мың теңгеден астам қаржылай көмек көрсетілген.
– Жалпы ислам дініндегі басты құндылықтардың бірі – қайырымдылық. Ал, қайырымдылық – қайырлы іс. Әрбір мұсылман баласы осы бір қағиданы берік ұстанып, адалдықтан айнымағанда болашағы нұрлы, бақыты баянды болары хақ. Сондықтан ізгілікті істерді кеңінен дәріптеп, мұқтаж жандарға қол ұшын созу бұдан былай да жалғаса беретін болады,– деді бас имам.
Жиын барысында өңір имамы дін өкілдеріне бас муфти бекіткен биылғы жылдың жоспарына сәйкес дін мен дәстүр, оқу-ағарту, оңалту, уағыз-насихат сынды 4 бағыт бойынша жұмыс жасауды тапсырып, бірқатар тың міндеттер жүктеді. Осыдан соң үздік мешіт имамдарына Наурызбай қажы Тағанұлының арнайы Алғыс хаты және Құрмет грамоталары табысталып, бағалы сыйлықтармен марапаттады.
Айдын КӘЛІМХАН
